विश्व महामारीका रूपमा फैलिरहेको कोरोना भाइरस (कोभिड १९) लाई नेपालमा फैलिन नदिन र नियन्त्रण गर्नका लागि नेपाल सरकारले गरेको लकडाउनको समयमा मूल्यवृद्धि भएको र कालोबजारी भएको भन्दै चक्रघट्टी जेसीजले बराहक्षेत्र नगरपालिकाको ध्यानाकर्षण गरेको छ ।
लकडाउनको विषम परिस्थितिको फाइदा उठाउँदै अत्यावश्यक दैनिक उपभोग्य सामाग्रीहरूमा वराहक्षेत्र नगरपालिकामा कृतिम अभाव सृजना गराइएको र अनावश्यक मूल्यवृद्धि भइरहेको जन गुनासोप्रति चक्रघट्टी जेसीजले चिन्ता र गम्भीरता प्रकट गरेको हो । सोमबार बराहक्षेत्र नगरपालिकाका नगर प्रमुखलाई ध्यानाकर्षण पत्र बुझाउने क्रममा जेसीजका अध्यक्ष सन्तोष चौलागाईंले सो कुरा बताएका हुन् ।
आवश्यक सतर्कता अपनाउँदै आवश्यक परेका बखत नगरपालिकाले २४ सै घण्टा प्रयोगमा ल्याउन सक्नेगरि जेसीजले आफ्नो एम्बुलेन्स उपलब्ध गराउने जानकारी समेत गरायो । ध्यानाकर्षण पत्र बुझ्दै नगरप्रमुख निलम खनालले जेसीजले उठाएको सम्बन्धित बिषयलाई आफूले गम्भीरताका साथ लिएको तथा आफू चिन्तित रहेको र निरन्तर गृहकार्य गरिरहेको बताए ।
सोही अवसरमा नगरपालिकामा हालसम्म कोरोना संक्रमण नदेखिएको र भोलिका दिनमा पनि नगरपालिकालाई कोरोनाबाट जोगाउनका लागि स्थानीय सरकारले गर्ने जुनसुकै क्रियाकलाप पनि जेसीज सक्रियताका साथ सहभागी हुन र निरन्तर सहयोग गर्न तयार रहेको चक्रघट्टी जेसीजका अध्यक्ष चौलागाईंले बताए ।
