सुनसरी । सुनसरीका पत्रकारहरुले नोबेल अस्पतालमा उपचार गराउँदा ५० प्रतिशत छुट पाउने भएका छन् । नेपाल प्रेस युनियन सुनसरीले नोबेल अस्पताल विराटनगरसँग छुट सम्झौता गरेसँगै अब सञ्चारकर्मीले छुट पाउने भएका हुन् ।
जिल्लाका विभिन्न मिडियामा आवद्ध पत्रकारहरुले छुट पाउने प्रेस युनियन सुनसरीका सभापति पवन अधिकारीले बताए । उनका अनुसार जुनसुकै रोगको उपचार गराउँदा ५० प्रतिसत छुट पाउने गरी अस्पतालसँग सम्झौता भएको छ ।
उपचार गराउन जाँदा लागि प्रेस युनियन सुनसरीको सिफारिस भने चाहिने अधिकारीले बताए । त्यसका लागि पत्रकारले समन्वय गर्नुपर्ने हुन्छ ।
एक कार्यक्रमका बीचमा नोबेल अस्पतालका प्रबन्ध निर्देशक सुनिल शर्मा, प्रशासकीय अधिकृत दिपेश राई र प्रेस युनियनको तर्फबाट अध्यक्ष अधिकारी र सचिव निशान प्रकृति थारुले हस्ताक्षर गरी सम्झौता गरिएको छ ।
सम्झौतापछि नोबेलका प्रबन्ध निर्देशक शर्माले व्यवसायिक रुपमा सहयोग गरौँ भन्ने उद्देश्यले उक्त सम्झौता गरिएको बताए । प्रेस युनियन सुनसरीले व्यवस्थित रुपले सबै पत्रकारहरुलाई समेटेर लैजानुपर्ने उनले बताए । बुधबार (आज)बाटै लागूहुने गरी एक वर्षका लागि उक्त सम्झौता भएको र एक वर्षपछि नवीकरण गरिने युनियनले जनाएको छ ।
अस्पतालसँग गरिएको यस सम्झौताले सुनसरीका पत्रकारलाई निकै राहत हुने युनियनका सचिव निशान प्रकृतिले बताए । अहिलेको कोरोना माहामारीको अवस्थामा सञ्चारमाध्यममा काम गर्ने कर्मचारीलाई आर्थिक रुपमा पनि यसले टेवा पुग्ने उनको भनाइ छ ।
