खोटाङ । खोटाङमा खुकुरी प्रहारबाट एक पुरुषको मृत्यु भएको छ भने एकजना घाइते भएका छन् ।
जिल्लाको केपिलासगढी गाउँपालिका २ खार्ताम्छामा आइतबार (आज) बिहान पौने ९ बजेको समयमा स्थानीय ३६ वर्षीय शुभराज राईले सोही स्थान वस्ने ६५ वर्षीय डिल्लीराज राईलाई खुकुरी प्रहार गरेका थिए ।
त्यसैगरी निजकै श्रीमती ६२ वर्षीया सममाया राईलाई पनि धारिलो हतियार खुकुरीले प्रहार गरेको र दुबैलाई उपचारका लागि हेलिकप्टरमार्फत काठमाडौं लैजाने तयारीगर्दा श्रीमानको मृत्यु भएको जिल्ला प्रहरी चौकी खोटाङले जनाएको छ ।
दुबैजनालाई खुकुरी प्रहार गरी घाइते बनाएको खबर प्राप्त गरेसँगै प्रहरी चौकी खार्ताम्छाको प्रहरी टोली घटनास्थल पुगेको थियो ।
प्रहरीका अनुसार घाइते सममायालाई कैलाश एयरको हेलिकोप्टरद्धारा काठमाडौं पठाइएको छ । खुकुरी प्रहार गर्ने शुभराज राईलाई नियन्त्रणमा लिई अनुसन्धान भइरहेको उक्त कार्यालयले जनाएको छ ।
