उदयपुर । बेलका नगरपालिकाका मेयर दुर्गाकुमार थापालाई कोरोना संक्रमण पुष्टी भएको छ।
मेयर थापासंगै एक स्वास्थ्य कर्मी ,नगरपालिका कर्मचारी सहित ६ जनामा कोरोना संक्रमण भएको जिल्ला जनस्वास्थ्य कार्यालय उदयपुरले जनाएको छ।
मेयर थापाको ८२ वर्षीय बुवा सुर्यबहादुर थापालाई गतसाता कोरोना पुष्टी भएपछि मेयर थापा होम क्वारेन्टीनमा बस्दै आएका थिए। मेयर थापा लगायत ५ जनालाई शनिबार नै कोभिड अस्पताल बेल्टारमा राखिएको छ भने अर्को एक जनाको बराह नगरपालिका को कोभिड अस्पतालमा राखिएको बेलकाका स्वास्थ्य शाखा प्रमुख कमल चौधरीले बताए ।
मेयर थापाको स्वास्थ्य अवस्था सामान्य नै रहेको सूचना पाएको नगरका प्रेस संयोजक ललित राईले बताए ।”मेयर साबको स्वास्थ्य अबस्था साबिक कै रुपमा रहेको र उहामा कोरोनाका लक्षणमा भनिएको जस्तो कुनै पनि लक्षण नदेखिएको सुचना पाएको छु,´ संयोजक राईले भने ।
मेयर थापालाई कोरोना भएको सूचना पाएपछि नेपाल कम्युनिस्ट पार्टी(नेकपा) का उदयपुर अध्यक्ष बिनोद कुमार कटुवाल’दिवस’ले आफ्नो फ़ेसबुक स्टाटसमा दुखद खबर भन्दै मेयर थापाको सिघ्र स्वास्थ्य लाभको कामना गरेका छन् ।
त्यसैगरी नेकपा बेलका नगरका अध्यक्ष मनोज तामाङले आफ्नो फेसबुक स्टाटसमा ‘मेयर साबको सिघ्र स्वास्थ्य लाभको कामना’ भनिएको छ।
कार्यालय एक साता बन्द
मेयर थापासंगै नगरपालिकाका कर्मचारीहरुमा पनि संक्रमण फेला परेपछि अत्यावश्यक सेवाका कामहरु बाहेक नगरपालिकाको कार्यालयबाट प्रबाह हुने सबै प्रकारका सेवाहरु एक सातासम्मका लागि स्थगन गरिएको निमित्त प्रमुख प्रशासकिय अधिकृत चेतनाथ गौतमले बताए।
अधिकृत गौतमकानुसार स्वास्थ्य सेवा संगै आकस्मिक पशु तथा कृषि सेवाको सेवाकार्य भने सञ्चालन हुनेछ । वडा कार्यालयको हकमा वडाले निर्णय लिने गौतमले जानकारी दिए ।
