बराहक्षेत्र । बराहक्षेत्र नगरपालिका कृषि शाखाले २०७७/७८ आर्थिक बजेट बाट नि:शुल्क अनुदानमा तरकारीको बीउ तथा धानको गबारो आदिको विषादी वितरण गरेको छ ।
कृषि विकास शाखाले किसानलाई अनुदानमा तरकारीको बीउका साथै धानबालि अनुगमन गरि धानमा लागेको विभिन्न रोग हरुको उपचार गर्न माग अनुसार किसानलाई विषादी वितरण समेत गरेको कृषि शाखा प्रमुख तुलसा लिम्बूले बताइन् ।
बराहक्षेत्र नगरपालिका ११ वटा वडाका किसानहरूलाई तरकारीको बीउ सहजै उपलब्ध होस् भनेर कृषि शाखाले प्रत्येक वडालाई ३ सयको दरले वडा कार्यालयलाई पठाइदिएको लिम्बूले बताइन् ।
उनका अनुसार तीन हजार तीन सय किसानलाई उन्नतजातको ९ प्रजातीका तरकारी जसमा मुला, चम्सुर, रायो, बन्दा , सुप, काउली, धनिया प्याज, टमाटर लगायतका तरकारीको बीउ बितरण गरिएको छ ।
अहिलेसम्म तरकारीको बीउ तीन हजार तीन सय र विषादी करिब १५ सय किसान गरि ४८ सय किसान लाभान्वित भएको कृषि विकास शाखाले जनाएको छ ।
बीउ र विषादी लाने क्रम जारी रहेको कृषि विकास शाखाकाले जानकारी दिएको छ । किसानहरुको उन्नति, प्रगतिबिना नगरको प्रगति हुन नसक्ने भएकाले किसानको हितमा नगरपालिकाले काम गरिरहेको नगरपालिकाले जनाएको छ ।
कृषि शाखाका अनुसार तरकारीको बीउ २ लाख ७५ हजारमा खरिद गरी सबै किसान लाई नि:शुल्क वितरण गरिएको छ । ´यसपटक हामीले आकास्मिक वाली संरक्षण कार्यक्रममा ५ लाख बजेट छुटाएको र उक्त बजेटबाट अहिले करिब १ लाख ५० हजार बराबर धानको गबारो लगायतको विषादी खरिद गरिएको हो,´ कृषि शाखाका प्राविधिक नीरबहादुर राईले भने, ´अझै धानमा फौजी लगायत अन्य समस्याहरु आउन भखर सुरु भएको हुँदा उक्त बजेट धानबाली आउने समस्यामा प्रयोग गर्दै जानेछौं ।´
कृषि विकास शाखाका प्राविधिकहरुले बेलाबेलामा किसानको तरकारी बारी साथै कृसकले लगाएको विभिन्न बाली निरीक्षण गरी सल्लाह सुझाव दिदै आइरहेको छ । बालीमा त्यस्तो रोग किरा देखा परेमा कृषि शाखामा सम्पर्क गर्न कृषि शाखाले आग्रह गरेको छ ।
