धरान । धरानमा कोरोना विरुद्धको भेरोसेल खोप र जान्सेन खोप लगाइने भएको छ । ५५ वर्ष वा सो भन्दा माथिकाको लागि भोली (सोमबार)देखि चाइनिज भेरो सेलखोप लगाइने भएको हो ।
उपमहानगरपालिकामा आज (आइतबार) आयोजित पत्रकार सम्मेलनमा धरानका ७ स्थानमा खोप केन्द्र तोकिएको स्वास्थ्य महाशाखा प्रमुख उमेश मेहताले जानकारी दिए । उनका अनुसार धरान स्वास्थ्य चौकी छाता चौकमा वडा नं. १, २, ३, १०, १२, र १६ का नागरिक र वैदेशिक रोजगारमा जाने व्यक्तीहरुले भिसा र पासपोर्टको आधारमा खोप लगाउन सक्नेछन् ।
पाँचकन्या स्वास्थ्य चौकी ठिंगाबारीमा वडा नं. ४, ५ र ६ का नागरिकहरुले लगाउन सक्नेछ । त्यस्तै विष्णुपादुका स्वास्थ्य चौकीमा वडा नं. २०, धरान ८ स्थित सभागृहमा वडा नं. ७, ८ र ९ का नागरिक तथा सार्वजनिक यातायातका चालक, सहचालक, विश्वविद्यालय, विद्यालयका प्राध्यापक, शिक्षक र शिक्षाका कर्मचारीहरुले लगाउन पाउने छन् ।
त्यसै गरी वडा नं. १३ स्थित आधारभुत स्वास्थ्य केन्द्रमा वडा नं. ४, १३ र १४ नागरिकहरुका साथै खोप लगाउन छुटेका सञ्चारकर्मी तथा पत्रकारहरुलाई पनि सोही केन्द्रमा खोप लगाईने छ । पूर्वाञ्चल ज्ञानचक्षु विद्यालयमा वडा नं. ६ र १५ का नागरिकहरुलाई लगाइने छ भने कार्मेल हाईस्कुलमा वडा नं. ११, १७, १८ र १९ का नागरिकहरुलाई लगाईने मेहताले बताए ।
उनले कोरोना विरुद्धको भेरोसेल खोप साउन ११, १२ र १३ गतेसम्म लगाइने जानकारी दिए । प्रत्येक खोप केन्द्रमा बिहान १० बजेदेखि बेलुका ४ बजेसम्म खोप लगाईने छ । धरानमा भेरोसेल खोप ५ हजार मात्रामा आएको छ ।
जान्सेन खोप दुई दिन लगाइने
यस्तै, अमेरिकन जोन सन खोप धरानमा साउन १४ र १५ गते दुईदिन लगाइने पनि स्वास्थ्य महाशाखाले पत्रकार सम्मेलन मार्फत जानकारी गराएको छ । स्वास्थ्य महाशाखा प्रमुख उमेश मेहताले ५० वर्षदेखि ५४ वर्ष उमेर समुहकालाई कोरोना विरुद्धको जान्सेन खोप लगाइने जानकारी दिए । साथै, उनका अनुसार जान्सेन खोप अति अशक्त अपाङ्गता भएका नागरिकहरु, स्वास्थ्य संस्थामा कार्यरत स्वास्थ्यकर्मी र सरसफाईकर्मीहरुलाई लगाइने छ । धरानका लागि जान्सेन खोप ५ हजार मात्रामा आउने उनले बताए । माथि तोकिएकै खोप केन्द्रमा जान्सेन खोप लगाइने छ ।
सुनसरीमा सोमबार देखि कोरोना विरुद्धको भेरोसेल खोप ३० हजार जनालाई तीन दिन लगाईदैछ ।
