कोरोना संक्रमित रामधुनीकी युवती बसेको क्षेत्र रामधुनी ३ मा सतर्कता बढाइएको छ । बुधबार सामाजिक विकास मन्त्रालय प्रदेश १, नगरपालिका, वडाकार्यालयसहितको एक टोलीले सो क्षेत्र निरीक्षण समेत गरेको थियो ।
सो टोलीले स्थानीलाई सतर्क रहन र नआत्तिन आग्रह समेत गरेको थियो । सो क्षेत्रमा सतर्कता बढाइएको र स्थानीयहरु आफै जागरुक भइरहेको नगर प्रमुख जयप्रकाश चौधरीले बताए ।
‘सामाजिक सञ्जालमा सिल गरियो भन्नेखालका स्टाटस आइरहेका छन्’ उनले भने, ‘तर, स्थानीयहरु आफै जागरुक भइरहेका छन्, हामीले सचेत रहन भनेका छौं । पूर्णरुपमा सिल नभएपनि सिलसरहको अवस्था भने छ ।’
पीसीआर रिपोर्ट आउन बाँकी
बुधबार उक्त युवतीको परिवार, छिमेकीलगायत सम्पर्कमा आएका १९ जनाको पीसीआर परीक्षण गरि जिल्ला अस्पताल इनरुवा पठाइएको छ । तर बिहीबार साँझसम्म पनि रिपोर्ट आइसकेको छैन ।
जिल्ला अस्पतालसँग रिपोर्टको विषयमा जानकारी लिने काम गरिरहेको नगरप्रमुख चौधरीको भनाइ छ ।
परिवारका सदस्य होम क्वारेन्टाइनमा
युवती बसेको घर तथा सम्पर्कमा आएकाहरु अहिले होम क्वारेन्टाइमा रहेको मेयर चौधरीले बताए । ‘पीसीआर रीपोर्टको पर्खाइमा छौं । परिवारका सदस्य सबै होम क्वारेन्टाइमा हुनुहुन्छ,’ प्रमुख चौधरीले भने, ‘रिपोर्ट अनुसार क्वारेन्टाइनमा राख्ने, स्वास्थ्य उपचार गर्ने वा सो क्षेत्र पूर्णरुपमा सिल गर्ने योजना छ ।’
झुम्का क्वारेन्टाइनमा २४ जना
हाल क्षेत्रीय कृषि अनुसन्धान केन्द्रझुम्कास्थित क्वारेन्टाइनमा २४ जना रहेका छन् । रामधुनी झुम्कासहित विभिन्न ठाउँका गरी २४ जना हाल क्वारेन्टाइमा बसेको नगरप्रमुख चौधरीले जानकारी दिए ।
त्रासमा रामधुनीबासी
हाल रामधुनी नगरबासी त्रासमा रहेका छन् । युवतिको सम्पर्कमा आएकाहरुको ट्रेसिङको कार्य चाँडै सक्न र सबैको पीसीआर परीक्षण गर्न स्थानीयले माग गरेका छन् । सामाजिक सञ्चालमा ट्रेसिङको कार्य चाँडै सक्न तथा स्थानीय तहले गरेको काम ढिलो भइरहेको भन्दै आलोचना समेत भइरहेको छ ।
भक्तपुरस्थित एक हस्टिलमा कार्यरत २५ वर्षीया ति युवति लकडाउन अघिदेखि रामधुनी ४ मा बस्दै आएकी थिइन् । केही दिन अघि भक्तपुर फर्किएपछि उनलाई कोरोना संक्रमणको पुष्टि भएको थियो ।
