युवाहरूलाई विदेशभन्दा पनि नेपालमै काम गर्न प्रेरित गर्दै आएको पाथीभरा जब लिङ्क इटहरीले प्रत्येक कामदारका लागि सात लाख रुपैयाँको निःशुल्क दुर्घटना बीमा गरिदिएको छ ।
जब लिङ्क र अजोड इन्स्योरेन्स लिमिटेड काठमाडौँबीच शुक्रबार (आज) दुर्घटना बीमासम्बन्धी सम्झौता भएको छ । सम्झौतासँगै प्रत्येक कामदारका लागि सात लाख रुपैयाँको निःशुल्क दुर्घटना बीमा सुनिश्चित भएको हो ।
अजोड इन्स्योरेन्सका सिइओ कुमारबहादुर खत्रीसँग निःशुल्क दुर्घटना बीमासम्बन्धी सम्झौता भएको पाथीभरा जब लिङ्कका प्रबन्ध निर्देशक पवन अधिकारीले बताए ।
सम्झौता–पत्रका अनुसार पाथीभरा जब लिङ्कमार्फत काममा जाने प्रत्येक कामदारको सात लाख रुपैयाँ बराबरको दुर्घटना बिमा हुनेछ, जसको प्रिमियम रकम जब लिङ्कले बेहोर्नेछ । अधिकारीका अनुसार अब बिमितको मृत्यु भएमा सात लाख, घाइते भएमा सत्तरी हजार र अङ्गभङ्ग भएमा बिमाङ्कबापतको ४० प्रतिशत रकम पाउनेछन् ।
पाथीभरा जब लिङ्क इटहरीले पूर्वका १२ जिल्लाका कर्पोरेट व्यावसायिक प्रतिष्ठान तथा वित्तीय संस्थामा आवश्यक कामदार पठाउँदै आएको छ । दुई वर्षमा एक हजार सात सयभन्दा बढी कामदारलाई काममा लगाएको र तीमध्ये धेरैजसो पठाइएको प्रतिष्ठानमा सन्तुष्ट भएर काम गरिरहेको प्रबन्ध निर्देशक बताए ।
