अभिनेता शिव श्रेष्ठसहित दर्जन बढी कलाकर्मी चलचित्र महोत्सवको अवसरमा एकसाथ सम्मानित भएका छन् । कोशी प्रदेशमा जारी चलचित्र महोत्सव २०८१ को अन्तिम दिन एक विशेष कार्यक्रमका बीच सम्मान प्रदान गरिएको हो । श्रेष्ठलाई कलाकारिताको माध्यमबाट राष्ट्रिय तथा अन्तर्राष्ट्रिय क्षेत्रमा पहिचान बनाएको भन्दै ‘विशेष योगदान सम्मान २०८१’ प्रदान गरिएको हो ।
कार्यक्रममा चलचित्र विकास बोर्डका पूर्वअध्यक्ष तथा निर्माता राज कुमार, कलाकार संघका अध्यक्ष मोहन निरौला, निर्देशक नविन सुब्बा, निर्माता छबिराज ओझा, पहिलो महिला निर्देशक सुचित्रा श्रेष्ठ, कलाकार तथा निर्देशक रमेश बुढाथोकी, रंगपत्रकार प्रकाश सुवेदीलाई पनि ‘विशेष योगदान सम्मान २०८१’ प्रदान गरिएको थियो ।
कोशी प्रदेशका आन्तरिक मामिला तथा कानूनमन्त्री लिलाबल्लभ अधिकारी, महोत्सवका संयोजक तथा चलचित्रकर्मी महासंघ कोशी प्रदेशका अध्यक्ष अरुणकुमार प्रधानलगायतले सम्मानित सबैलाई दोसल्ला, खादासहित प्रमाण पत्रले सम्मान गरे ।
सोही अवसरमा वरिष्ठ कलाकार तथा निर्देशक लक्ष्मीनाथ शर्मालाई ‘लाइफटाइभ अचिभमेन्ट सम्मान २०८१’ प्रदान गरिएको थियो । चलचित्रकर्मी कुवेर शर्मा, चिरञ्जिवी बस्नेत, केशव रायमाझी, सबुरलाल चौधरी, लाखमान योजन, सुमित खड्का, गायक श्रीकृष्ण लुईटेल, वीरेन्द्र झा, विपिन प्रसाईं, सुवास मेचे, प्रेम देवानलगायतले ‘प्रादेशिक सम्मान’ प्राप्त गरे ।
आन्तरिक मामिला तथा कानून मन्त्रालय कोशी प्रदेशको आयोजनामा सिटीपार्टी प्यालेसमा आयोजित कार्यक्रममा चलचित्र कलाकार संघका निवर्तमान अध्यक्ष रवीन्द्र खड्का, चलचित्र विकास बोर्डका पूर्वअध्यक्ष राजकुमार राई, चलचित्र कलाकार संघका अध्यक्ष मोहन निरौला, चलचित्र पत्रकार संघका केन्द्रीय उपाध्यक्ष कुवेर गिरी, निर्माता संघका कोषाध्यक्ष ज्योतिराज राईलगायत विभिन्न क्षेत्रका थुप्रै व्यक्तिहरुको सहभागिता रहेको थियो ।
कोशी प्रदेशमा चलचित्रको गतिविधि बढाउँदै सोही क्षेत्रमा बनेको चलचित्रको प्रवद्र्धन गर्ने उद्देश्यले आयोजित महोत्सवमा छोटो तथा फिचर गरेर ४४ फिल्मको सहभागिता थियो । प्रदेशमै पहिलो पटक आयोजना भएको महोत्सव भएकाले सहभागी सबै फिल्मकर्मीलाई अवार्ड तथा प्रमाणपत्र प्रदान गरिएको थियो । कार्यक्रममा आन्तरिक मामिला तथा कानूनमन्त्री अधिकारीले कोशी प्रदेशलाई चिनाउन चलचित्र महोत्सवले महत्वपूर्ण भूमिका खेल्ने बताए । उनले चलचित्र महोत्सवलाई आगामी दिनमा पनि निरन्तरता दिनुपर्ने धारणा राखे ।
कोशी प्रदेशका मुख्यमन्त्री हिक्मत कार्कीले उद्घाटन गरेसँगै शुरु भएको महोत्सवमा कोशी प्रदेशमा चलचित्र निर्माण, विश्वबजारमा नेपाली चलचित्र, नेपाली चलचित्रमा महिला भन्ने विषयमा दिनेश डिसी, नवल खड्का, नविन सुब्बा, सुचित्रा श्रेष्ठ र संगीता श्रेष्ठलगायतका वक्ता रहेको अन्तरक्रियासमेत आयोजना भएको थियो ।
६ दिन कोशी प्रदेशका विभिन्न स्थानमा चलचित्र प्रदर्शन गरिएको महोत्सव कोशी प्रदेशलाई चलचित्र हव बनाउने र यहाँका चलचित्रको प्रचारप्रसार गर्दै चलचित्रकर्मीलाई प्रोत्सहान गर्ने उद्देश्यले आयोजना गरिएको आयोजक चलचित्रकर्मी महासंघका अध्यक्ष अरुण प्रधानले बताए । आगामी दिनमा पनि यस्ता महोत्सव निरन्तर आयोजना गर्दै जाने उनले सुनाए ।
