इटहरी । सुनसरी सदरमुकाम इनरुवामा सुरुभएको ‘प्रथम इनरुवा उत्सव, चलचित्र महोत्सव’ सम्पन्न भएको छ । समापनका दिन लोकप्रिय गायिका एलिना चौहानले करिब ५ हजार इनरुवाबासलाई आफ्ना लोकप्रिय गीतहर प्रस्तुत गरेकी थिइन् ।
चौहानले धोकेबाज हौ तिमी, मिनिरल वाटर, गोदावरी वनैमा लगायत आफ्ना हिट गीतहरु गाएर इनरुवाबासीलाई झुमाइन् । नेपाल चलचित्रकर्मी महासंघ प्रदेश १ को आयोजना तथा इनरुवा नगरपालिका सुनसरीको संयोजनमा संचालन भएको यो महोत्सव फरक शैलीमा आयोजना गरिएको थियो । इनरुवामा पहिलोपटक आयोजना भएको यो महोत्सवले स्थानिय मौलिक भाषा, कला, सस्कृति, पहिचान र प्रतिभालाई प्रबद्र्धन गर्न सफल भएको आयोजक संस्थाका अध्यक्ष तथा महोत्सवका परिकल्पनाकार अरुण कुमार प्रधानले बताए ।
महोत्सवको सुरुवाती दिनदेखी ५ दिनसम्म चलचित्र महोत्सव अन्तर्गत प्रदेश १ मा बनेका लामो तथा छोटो १८ चलचित्रहरुलाई इनरुवामा अवस्थित सिबि सिनेमा हलमा निस्शुल्क प्रदर्शन गरिएको थियो । यस्तै इनरुवा उत्सव अन्तर्गत इनरुवामा योगदान दिएका व्यक्ति तथा परिवारहरुलाई सम्मान गरिएको थियो ।
११ दिने उत्सवका अवधिमा कुस्ती प्रतियोगिता, बेहुली सुन्दरी प्रतियोगिता, तरकारी उत्पादन प्रतियोगिता, निबन्ध प्रतियोगितासँगै साहित्य सम्मेलन, फेसन शोका माध्यमबाट जातीय पहिरन प्रदर्शन लगायतका कार्यक्रमहरु समावेश गरिएकाे थियाे । विविध कारणवश सोचेका, बोलेका र अझै गर्न खोजेका केही योजनाहरु गर्न नसकेको आयोजक संस्थाका अध्यक्ष तथा महोत्सव परिकल्पनाकार प्रधानले बताए ।
