इटहरी । धनगढीमा आयोजना हुन लागेको राष्ट्रिय बाल चलचित्र महोत्सव २०८१ मा बाल लघु चलचित्र ‘गौँथली’ प्रदर्शन गरिने भएको छ ।
सुनसरी इटहरीकी कृन्जल पौडेलको लेखन तथा निर्देशन रहेको बाल लघु चलचित्र ‘गौँथली’ ले बाल श्रमको विषय उठान गरेको छ । इटहरीमा निर्माण गरिएको बाल लघु चलचित्रमा रितेश जंग खत्री पौडेल, प्रमीला लम्साल, उदय सुब्बा, सुभद्रा प्याकुरेल, मनीषा बस्नेत साथै बाल कलाकार कृष्टिना पौडेल र निर्देशक समेत रहेकी कृन्जल पौडेलको भूमिका रहेको छ ।
चलचित्रको छायाङ्कन प्रकाश सुब्बाले गरेका हुन् । चलचित्रको सम्पादन भने हेमन तामाङले गरेका छन् । परिधि फिल्मस एण्ड इन्टरटेन्मेन्ट प्रा.लि.का. ब्यानरमा बनेको साे लघु चलचित्रको छायाँकन इटहरीमै गरिएको हो ।
केही समय अघि इटहरीमा बालबालिकाका लागि चलचित्र निर्माणसम्बन्धी ‘मेरो कथा, मेरो चलचित्र’ कार्यशाला आयोजना भएको थियो । सोही कार्यशालामा सिकाइए बमोजिम निर्माण भएको बाल लघु चलचित्र ‘गौँथली’ लाई राष्ट्रिय बाल चलचित्र महोत्सव २०८१ प्रदर्शन गर्न लागिएको हो ।
महोत्सव चलचित्र विकास बोर्डको आयोजनामा आगामी असार ७, ८ र ९ गते धनगढीमा हुँदैछ ।
