इटहरी । इटहरी उपमहानगरपालिकाका निवर्तमान मेयर द्वारिकलाल चौधरीले छिमेकीको जग्गा हडपेर माछापालन गरेको पाइएको छ । उनले छिमेकीको करिब एक कठ्ठा जग्गा खनेर माछा पालन गरिरहेको जग्गा धनीको आरोप छ । पत्रकार सम्मेलन गर्दैै जग्गाधनी प्रदीपकुमार खतिवडाको परिवारका सदस्य कसैलाई नसोधी चौधरीले जग्गा खनेर माछा पालन गरेको आरोप लगाए ।
खतिवडाको नाममा रहेको इटहरी १७ बालग्राममा रहेको ८ (घ) नक्सा नम्बरको कित्ता नं. ६०६ को जग्गा चौधरीले करीब दुई महिनाअघिदेखि हडपेर माछा पालन गरिरहेको परिवारले जनाएका छन् । पीडित परिवारले आफूहरुमाथि शक्तिको आडमा दमन भएको बताएका छन् ।
घर इटहरी ४ मा भएकाले घरमै बस्दा खासै सो जग्गामा आउने नगरेको खतिवडाको भनाई छ । अन्य व्यक्तिहरुले सोधेपछि मात्र आफूहरुलाई थाहा भएको र आश्चर्यमा परेको उनले बताए । ‘हामीले यो विषयमा पटकपटक वहाँलाई भन्यौं, तर बेवास्ता गरेपछि अहिले पत्रकार सम्मेलन गरेर सार्वजनिक गर्न बाध्य भयौं,’ पीडित खतिवडाले भने, ‘हामीलाई नसोधी आफ्नै मनखुसी अरुको जग्गा खन्न कसरी पाइन्छ ?’
खतिवडाले गत २०६३ सालमा नै द्वारिकलालका बुवा नाथुराम चौधरीबाट जग्गा खरिद गरेका थिए । अहिले कसैलाई नसोधी आफ्नो जग्गामा माछा पालन गरेपछि पीडितले न्याय माग गरिरहेका छन् ।
इटहरी उपमहानगरपालिकामा गत २७ भदौमा नै निवेदन समेत दिएको पीडित प्रदीपका छोरा अनमोल खतिवडा बताउँछन् । सोही दिन उपमहानगरले पत्र काटेर स्पष्टीकरण सोधेपनि चौधरीले कुनै पनि किसिमको जवाफ दिएका छैनन् ।
‘जग्गा हडपेपछि हामीले इटहरी उपमहानगरपालिकामा निवेदन पनि हाल्यौँ, मेयरमार्फत गत २७ भदौमा पत्र पठाइयो उहाँले पत्र बुझ्न मान्नुभएन’ छोरा अनमोलले भने, ‘घडेरी जग्गा भएकाले हामी बेलाबेला मात्रै जग्गामा जान्थ्यौँ ।’ पीडितले भने पहिलेकै जस्तो पुरिदिन माग राखेका छन् ।
निवर्तमान चौधरी भने खन्ने क्रममा केहीफिट परेको होला, फुर्सदमा बनाइदिने बताउँछन् । ‘खेत त्यहीँ छ, कहीँ गएको छैन । खन्नेक्रममा अलिअलि उनीहरुको पर्योहोला,’ उनले भने, ‘फुर्सदमा पुरिदिने भनिराछु ।’
चौधरी इटहरी उपमहानगरपालिकाको मेयर हुँदा पटकपटक विवादमा आइरहन्थे । २०७४ को निर्वाचनमा नेकपा एमालेबाट विजयी भई इटहरीको मेयर बनेका चौधरी हाल गठबन्धनको तर्फबाट माओवादी केन्द्रबाट सुनसरी क्षेत्र नं. २ (क) बाट प्रदेश सभा सदस्यको उमेदवार समेत हुन् । उनी केही दिन हप्ता अगाडि मात्रै नेकपा एमाले परित्याग गरी माओवादी केन्द्रमा प्रवेश गरेका थिए ।
