बराहक्षेत्र । सडक मिचेर नाला निर्माण गरेको भन्दै सुनसरी बराहक्षेत्रका रेल्वेवासिहरु आन्दोलनमा उत्रेका छन् । बुधबार पत्रकार सम्मेलन गरी बराहक्षेत्र चक्रघट्टीको रेल्वे संघर्ष समितिले आफ्ना माग समयमै स्थानीय सरकारले सुनुवाइ नगरे भोक हड्तालमा उत्रिन बाध्य हुने जनाएको छ ।
मुनाल चौकदेखि बसपार्कसम्म निर्माणाधिन ढलनाला सडकबाट २-३ फिट पूर्वतर्फ मिचेर बनाएको, जग्गा नाप्दा डिमर्केशनबाट नापी गर्नुपर्नेमा जथाभावी नापजाँच गरिएको, रेल्वे बासिन्दाले बराहक्षेत्र नगरपालिकाको न्यायिक समितिमा निवेदन दिएपनि त्यसमाथि सुनुवाइनै नगरी हतारपुर्वक ढलनाला निर्माण गरिएको, स्थानीय सरकार आफैले न्यायिक समितिको अस्तित्व समाप्त पार्ने काम भएकोमा संघर्ष समितिको गम्भीर ध्यानाकर्षण भएको रेल्वे संघर्ष समितिका सचिव ईन्द्र भुजेलले बताए ।
नगरपालिकाले गरेको ढलनाला निर्माण चार आनाको मुर्गि बार्हानाको मसला भएको समेत जनाएको छ । २० लाख रुपैयाँ कुल बजेटमा निर्माण भएको सो ढलनालामा ६ वटा विद्दुत पोल परेको र सो पोल नालीबाट स्थानान्तरण गर्दा प्रतिपोल २ लाखका दरले १२ लाख रुपैयाँ खर्च हुने समितिले जनाएको छ । संघर्ष समितिले एकतर्फी समिति निर्माण गरी ढलनाला बनाएको समितिको आरोप छ ।
ढल निर्माणको क्रममा सडकको पुर्व तर्फ रेल्वेमा वसोवास गर्ने स्थानीयको विरोध रहदा रहदै सडक पश्चिम तर्फका स्थानीयलाई मात्र ढलनाला समितिमा राखेर निर्माण कार्य गरेकोमा समितिले विमति जनाएको छ । समितिले यो ढल निर्माणको शैलिलाई नजिर वनाएर भोलि नगर भरिनै गलत ढंगबाट विकासका गतिविधि हुने हुदा यसलाई नजिरको रुपमा विकसित हुन नदिनु पर्ने धारण समेत सार्वजनिक गरेको छ ।
गाउँ विकास समितिमा दलीय राजनीतिक संयन्त्र हुँदा सडकको चौडाई निर्धारण गरिएको थियो, समितिका अध्यक्ष माधब बरालले भने, सोहि क्षेत्रमा शिवालयदेखि मुनाल चौकसम्म ढलनाला निर्माण गरियो । तर मुनाल चौकदेखि बसपार्कसम्म भने नालालाई २(४ फिट पुर्व तर्फ सासेर निर्माण गरिनु मिचाहा प्रवृत्ति हो। यदि संघर्ष समितिलाई नगरले उचित सम्वोधन नगरे चरणवद्द्ध आन्दोलित हुने भुजेलले बताए ।
संघर्ष समितिले यस अघिनै बराहक्षेत्र नगरपालिकालाई ध्यानाकर्षण पत्र हस्तान्तरण गरिसकेको छ । यता बराहक्षेत्र नगरपालिकाका मेयर निलम खनालले नगरपालिकाको प्राविधिकले नापजाँच गरेर सिमाङ्कन गरेकोले हुँदा निर्माणप्रती चित्त नबुझे अदालत जान सक्ने प्रतिक्रिया दिएका छन् ।
