रामधुनी । इटहरी १८ नयाँटोल (चोक) का स्थानीयहरुले प्रहरीकाे ज्यादती बढेकाे आरोप लगाएका छन् ।
बिहीबार राति ८ बजेतिर इलाका प्रहरी कार्यालय कान्छिचोकबाट आएका प्रहरीले आफूहरुलाई धम्क्याउनुका साथै अपशब्द समेत बोलेको स्थानीयको भनाइ छ । उनीहरुका अनुसार केहीबेर विवाद समेत भएको थियो ।
उनीहरूका अनुसार राति लाइन गएको समयमा गर्मीले गर्दा बाहिर घर बाहिर बसेको अवस्थामा प्रहरी आएर एक्कासी ठूलो स्वरमा धमक्याउँदै भित्र जान भनेका थिए । गर्मी भएकाले केही समय बाहिर बसेर भित्र जाने भन्दै गर्दा प्रहरीले थर्काउन थालेको स्थानीय अष्टमाया राईले बताइन् । नयाँटोल चोकमा पसल व्यवसाय गरेर बसेपनि पसलभित्रबाटै सुत्न जानुपर्ने, कसैको पसलमै सुत्नुपर्ने भएको र केहीबेर बाहिर बस्दा प्रहरीहरुले ज्यादती गरेको उनको भनाइ छ ।
‘पसल लगभग बन्द भइसकेको थियो । कोही पनि ग्राहक थिएनन् । खानाबनाउँदैथिए । बिजुली थिएनं’ उनले भनिन्, ‘तर प्रहरीले एक्कासी आँखाआँखामा लाइटको प्रकाश देखाउँदै थर्काउन थाले । हामीले केही बेरमै बन्द गरेर सुत्छौं भन्दा अपशब्दहरु समेत बोले ।’
सर्वसाधरणसँग प्रहरीले गरेको व्यवहार हेर्दा सँधै त्रासमा बस्नुपर्ने अवस्था आएको स्थानीय बताउँछन् । महिला (मलाई)लाई गाली गर्दा र थर्काउँदा किन यस्तो गरेको भनेर साेध्दा छोरालाई पनि थर्काएको, हत्कडी लगाउने भन्दै धम्काएको मायादेवी श्रेष्ठले बताइन् ।
केही एक दुईजना बाहेक सबैले मास्क लगाइरहेको अवस्थामा मास्क किन नलगाएको भन्दै थर्काउने प्रहरीले नै मास्क नलगाएको स्थानीयको भनाइ छ । ‘हामीलाई हाम्रो ज्यानको माया छ । लकडाउन छ, हामी पनि सचेत छौं,’ तर मास्क कै विषयमा हामीलाई कराउँदा प्रहरीले मास्क लगाउनु पर्दैन ?’ मायादेवीले भनिन्, ‘राति बाहिर बसिरहनु हाम्रो रहर पनि होइन । सुत्ने ठाउँ नै सटरबाट भित्र जानुपर्छ । पंखा नचल्ने भएको हुँदा एकछिन बाहिर बसेका थियौं ।’
मायादेवीका छोरा दीपेश श्रेष्ठले पनि महिलाहरु र आफूलाई पनि हप्काएको गुनासो गरे । ‘गाडीमा महिला प्रहरी पनि हुनुहुन्थ्यो,’ उनले भने, ‘कम्तिमा महिलाले नै सम्झाएको बुझाएको भए हुन्थ्यो ।’
स्थानीय नै सचेत छैनन्, यदी प्रहरीबाट त्यस्तो भए हामी सम्झाउँछौं : इन्स्पेक्टर अधिकारी
उता इलाका प्रहरी कार्यालय पकलीका इन्स्पेक्टर कैलाश कुमार अधिकारीले भने यदी घटना त्यस्तै भएको हो भने सो कार्य गर्ने प्रहरीलाई सम्झाउने बताएका छन् । त्यो सँगै प्रहरी भन्दा पनि स्थानीय कै कारण विवाद भएको उनले बताए । ‘सो ठाउँका स्थानीय नै सचेत छैनन् । हामीले हरेक पटक भिडभाड नगर्न अनुरोध गर्छौ,’ उनले भने, ‘तर त्यहाँ हरेकपटक भिडभाड हुन्छ । होहल्ला समेत हुन्छ । सम्झाउन खोज्दा उल्टै प्रहरीमाथी झम्टिन खोज्छन् ।’
आगामी दिनमा सोही कार्य स्थानीयले दोहो¥याए हामी थप कडा बन्नुपर्ने र सोसहित अन्य केही ठाउँमा थप निगरानी गर्ने उनको भनाइ छ । लकडाउनको समयमा सबैजना सचेत बन्नुपर्ने प्रहरीले जनाएको छ ।
