बराहक्षेत्र । बराहक्षेत्र नगरपालिका वडा नम्बर ३ नडाहामा जनताद्वारा निर्माण गरिएको वडा कार्यालय सञ्चालनमा आएको छ । आइतबार विधिवत रुपमा वडाका कामकाज सुरु गरिएको हाे ।
गत वैशाख २७ गते शिलान्यास गरिएको वडा कार्यालयको भवनबाट काम समेत सुरु गरिएको वडा सचिव निलम कार्की बताए ।
जनताले नै आर्थिक संकलन गरेर बनाएको वडा कार्यालयको भवन ५ कोठाका रहेको निर्माण समितिका अध्यक्ष केशव पुरीले बताए । उनका अनुसार भवन निर्माण गर्न करिब २८ लाख रुपैयाँ खर्च भएको छ । भवन अपाङ्गमैत्री रहेको छ । भवनलाई नगरपालिकाको नगरसभाबाट समेत पास गरेको दाहालको भनाइ छ ।
नगरपालिकाको रातो किताबमा नडाहामा निर्माण गरिएको सो भवन नै ३ नम्बर वडा कार्यालय हो भनी लेखिएको वडाध्यक्ष रुद्र दाहालले बताए । सो भवनबाट कामकाज सुरु भएसँगै अब वडा कार्यालयको विषयमा भएका सबै विवाद र बहस सकिएको दाहालले बताए ।
हालसम्म २४ लाख १४ हजार रुपैयाँ खर्च भएको कोषका अध्यक्ष भीमदल राईले जानकारी दिए । उनका अनुसार २ लाख ४ हजार रुपैयाँ बचत रहेको छ भने भुक्तानी गर्न ६ लाख ५० हजार बाँकी छ । करिब ३० लाख रुपैयाँ संकलन हुने अनुमान गरिएको राईले बताए ।
