बराहक्षेत्र । सुनसरीको बराहक्षेत्रमा बालिका हत्या गरेको आरोपमा स्थानीय ८ जनालाई प्रहरीले पक्राउ गरेको छ ।
बराहक्षेत्र १ कटहरेस्थित आफ्नै घरमा शुक्रबार एक बालिकाको हत्या भएको र सो हत्याको आरोपमा उनीहरूलाई पक्राउ गरिएको इलाका प्रहरी कार्यालय महेन्द्रनगरले जनाएको छ ।
१२ वर्षीया बालिका मिना राई मृत भेटिएकी र बालिकाको हत्याको आशंकामा स्थानीय ८ जना युवाहरुलाई नियन्त्रणमा लिएको हो ।
प्रहरीका अनुसार शुक्रबार राति छिमेकीमा धामी बसेको हेर्न बालिका मिना उनका आमा बुवासँग गएकी र उनी आमाबुवा भन्दा अघि नै फर्किएकी थिइन् । धामी बसेको हेरेर अबेर बाबुआमा फर्किँदा बालिका घरमै मृत अवस्थामा फेला परेकी थिइन् ।
मृत भेटिएकी बालिका राईको टाउकोमा दुई तीन ठाउँ चोट र घाँटीमा रुमाल र टिसर्ट बेरिएको अवस्थामा पाइएको थियो । घटनास्थल वरपर वियरका बोतलहरु रहेको र त्यसमध्ये एउटा बोतल फुटेको अवस्थामा भेटिएको र शवको अवश्था हेर्दा हत्या भएको हुन सक्ने प्रहरीको भनाइ छ ।
