बराहक्षेत्र । बराहक्षेत्र नगरपालिकाले गत बुधबार ५० जनाको स्वाब संकलन गरेकोमा ३३ जनाको रिपोर्ट पोजेटिभ आएको छ । शनिबार बराहक्षेत्रका ३३ जनाको रिपोर्ट पोजेटिभ आएको आइसोलेशन इन्चार्ज प्रमोद यादवले बताए ।
यादवका अनुसार थपिएका ३३ जनाको वडासहितको रिपोर्ट आउन बाँकी छ । सोही कारण थपिएकाको वडा भने खुल्न सकेको छैन ।
शनिबार थपिएका ३३ जनाबाहेक अहिलेसम्म नगरमा वडा नम्बर १ का ३ जना, वडा नम्बर २ का १३ जना, ३ नम्बर वडाका ३ जना, ४ नम्बर वडाका ४ जना, ५ नम्बर वडाका ७ जना, ६ नम्बर वडाका ८ जना, ७ नम्बर वडाका ९ जना, ८ नम्बर वडाका ५ जना, ९ नम्बर वडाका ४ जना, १० नम्बर वडाका ९ जना, ११ नम्बर वडाका ५ जना, वडा नम्बर नखुलेका २ जना गरी ७२ सक्रिय संक्रमित रहेको बराहक्षेत्र स्वास्थ शाखाका जनस्वास्थ्य निरीक्षक उमेश मेहताले बताए ।
शनिबार थपिएका ३३ सहित अहिले बराहक्षेत्रमा कोरोना संक्रमितको संख्या एक सय ५ पुगेको छ ।
नगरपालिकाको आइसोलेसनमा ७ जना रहेको र अन्य संक्रमित होम आइसोलेशनमा रहेको यादवले बताए ।
हालसम्म बराहक्षेत्रमा कोरोना संक्रमणका कारण मृत्युहुनेको संख्या ४ रहेको छ ।
