सुनसरी । सुनसरीको हरिनगर गाउँपालिकामा लकडाउन कडा बनाउन गाउँपालिका अध्यक्ष र प्रहरी सडकमा निस्केका छन् । प्रहरीलाई साथ दिँदै अध्यक्ष गफार अन्सारी समेत सडकमा निस्केका हुन् ।
सुनसरीमा कोरोनाका संक्रमित बढ्दै गएपछि सुनसरी प्रशासनले वैशाख ३१ गरे मध्यरातिबाट लागू हुने गरी १५ दिनका लागि जिल्लाभर पूर्ण निषेधाज्ञा जारी गरेको थियो । सोही अनुसार जेठ १ शनिबारबाट सुनसरीमा सबै क्षेत्रमा लकडाउन कडा बनाइएको छ । प्रहरी र नेपाली सेनालाई समेत परिचालन गरिएको छ ।
यस्तो महामारीबाट अति आवश्यक काम बाहेक कुनै पनि ब्यक्ति आफ्नो घरबाट बाहिर न निस्किन जनपथ र सशस्त्र प्रहरी प्रमुखसहित अध्यक्ष अन्सारीले आग्रह गरेका छन् ।
कोरोना भाइरस संक्रमण भएमा हप्ता दिन सम्म रोग देखा नपर्ने भएपछि एक आपसमा नटाँसिइ बस्न र टोल टोलमा भिडभाड नगरिदिन आग्रह गरेका हुन् ।् आफन्त संक्रमित भएमा १ मिटरकै दुरीबाटै कुराकानी गर्न र सकेसम्म लकडाउन खुकुलो नभएसम्म आफन्तहरुसँग पनि नभेट्न आग्रह गरे ।
हरिनगरबासीले केही दिनदेखि लकडाउनलाई नटेरी हिँडिरहँदा झन् जोखिम बढ्ने भएकाले आफू पनि सडकमा निस्किएको अध्यक्ष अन्सारीले बताए । अध्यक्ष अन्सारीले जेठ १५ गतेसम्म जारी गरिएको निषेधाज्ञामा अतिआवश्यक काम बाहेक जो कोही ब्यक्ति घरबाट बाहिर निस्किएमा कानुन बमोजिम कार्वाही गर्ने प्रहरीलाई निर्देशन दिएका छन् ।
भुटाहा, हरिनगरा, बसन्तपुर र घुस्कीका प्रहरीलाई निषेधाज्ञालाई अवज्ञा गरी हिँड्ने महिला, पुरुष वा भिडभाड, सभा, समेलन, गर्ने व्यक्तिलाई समेत कारबाही गरिने उनले बताए ।
