सुनसरी । झुम्का कारागारका ज्येष्ठ नागरिक कैदीबन्दीका लागि छुट्टै संरक्षण स्थलको व्यवस्था नहुँदा दैनिक कष्टकर बन्दै गएको छ । अन्य उमेरसमुह भन्दा कमजोर र वृद्ध हुने भएकाले संरक्षणका लागि छुट्टै व्यवस्था नहुँदा जीवन कष्टकर बन्दै गएको हो ।
ज्येष्ठ नागरिकको कारागार बसाईलाई सहज बनाउन सरकारले छुट्टै भवनको व्यवस्था पनि नगरेको र उमेर अनुसार कैद माफी बाहेक अर्को कुनै सुविधा नभएको सुनसरीको झुम्का कारागारका जेलर महेन्द्र खड्काले बताए ।
विभिन्न अपराधिक घटनाबाट अदालतले कैद सजाय फैसला गरेपछि कारागारमा कैदीबन्दीको रुपमा सजाय अवधि बिताउँछन् । अन्य उमेर समुहको हकमा सहज भएपनि वृद्धवृद्धाहरुलाई भने असहज भएको देख्न सकिन्छ । झुम्कास्थित कारागारमा बालबालिकालाई तुरुन्तै सुधार गृहमा पठाउने गरिएको छ तर ज्येष्ठ नागरिकका लागि छुट्टै व्यवस्था केही छैन । यद्यपि ज्येष्ठ नागरिकका लागि उमेर अनुसार कैद माफी पाउने सरकारको नियम अनुसारको तथ्य मात्र खुलाउँछन सुनसरीको झुम्कास्थित कारागारका जेलर महेन्द्र खड्का । उनका अनुसार ६५ वर्ष कटेकालाई २५ प्रतिशत कैद भुक्तानमा छुट हुन्छ । त्यसैगरी ७० वर्षमाथिका ज्येष्ठ नागरिकलाई ५० प्रतिशत र ७५ वर्ष कटेका ज्येष्ठ नागरिकलाई भने ७५ प्रतिशत नै कैद छुट हुने भए पनि न्यायिक निकायको निणर्यका आधारमा उनीहरु जेलमुक्त हुने अवस्था रहेको छ ।
त्यसो त सरकारले राष्ट्रिय उत्सवको बेलामा कैदीहरुलाई आममाफी दिने प्रचलन पनि रहेको छ । गत असोज ३ गतेको संविधान दिवसको अवसरमा उक्त कारागारबाट कर्तव्यज्यानको १ जना, डकैती, चोरीलगायतका घटनामा संलग्न ३९ जना कैदीबन्दी कारागारमुक्त भएको समेत खड्काले बताए । हरेक कारागारमा कारागारको क्षमता भन्दा बढी कैदी राखेर सहज रुपमा बाँच्न पाउने अधिकारको समेत हनन भइरहेको सन्दर्भमा अन्य कारागार भन्दा धेरै राम्रो रहेको र एक सय ६१ जना कैदीबन्दी मात्र बढी रहेको तथ्य पनि जेलर खड्काले खुलाए ।
खड्काले अन्य कारागार भन्दा झुम्कामा धेरै सुविधा रहेको र उनीहरुको जीवन शैली उत्कृष्ट रहेको दाबी गरे । खानपिन व्यवस्थापनदेखि स्वास्थ्यका लागि आवश्यक शारीरिक ब्यायमका पूर्वाधार भए पनि उपचारको भने व्यवस्था नभएको र कोही विमारी हुँदा सिधै धरानस्थित बीपी कोइराला स्वास्थ्य विज्ञान प्रतिष्ठानमा जुनसुकै बेला पठाउने गरिएको जानकारी दिए ।
