रामधुनी । सुनसरीको रामधुनी नगरपालिकाले रामधुनी मन्दिरका लागि आगामी आर्थिक वर्ष २०७८/०७९ का लागि एक करोड ५० लाख रुपैयाँ बजेट छुट्याएको छ ।
प्रस्तुत गरिएकाे नीति तथा सार्वजनिक कार्यक्रममा पर्यटन विकास अन्तर्गत रामधुनी मन्दिरको विकासका लागि सो बजेट छुट्याइएको हो ।
‘नगरक्षेत्रमा धार्मिक पर्यटकीय आर्कषणको रुपमा रहेका रामधुनी मन्दिर क्षेत्रलाई पर्यटकीय हवको रुपमा गौरवको योजना अन्तरगत विकास गर्न तयार भएको गुरु योजना आुसारको कार्य अगाडि बढाउन बिस्तृत प्राविधिक अध्ययन प्रतिवेदन (डीपीआर) र वातावरणीय परीक्षण (आईईई) गरि निर्माण कार्यलाई निरन्तरता दिन १ करौड ५० लाखको बजेटको व्यवस्था गरिएको छ ।’ नीति तथा कार्यक्रममा उल्लेख गरिएको छ ।
यसका साथै नगरमा रहेका आदिवासी जनजाती संग्राहलय, आदिवासी जनजाती पार्क, वडा नं. १, ५, ६, ७ र ९ मा निर्माणधीन बालउद्यान, शंकरवेली, रास ताल, प्रेमताल, जुडीसिमसार क्षेत्र लगायतका पर्यटकीय क्षेत्रहरुको पर्यटकीय पूर्वाधार विकास निर्माण गर्न समेत आवश्यक बजेटको व्यवस्था गरिएको नगरले जनाएको छ ।
त्यसै गरी आगामी आर्थिक वर्षमा नगर भित्रका प्रमुख पर्यटकीय स्थलहरुमा प्राथमिक उपचारका लागि आवश्यक पर्ने सामाग्रीहरु पर्यटकीय स्थल प्रवेशद्धारमा राखिने समेत नीति तथा कार्यक्रममा उल्लेख गरिएको छ । साथै पर्यटकीय स्थलमा महिलाहरुको महिनावारी समस्यालाई मध्यनजर गर्दै सेनेटरी प्याड राख्नका लागि अटोमेटिक भेण्डिङ मेसिन समेत जडान गर्ने व्यवस्था मिलाइने नगरले जनाएको छ ।
चालु आर्थिक वर्षका लागि नगरपालिकाले रामधुनी मन्दिरका लागि ५० लाख रुपैयाँ बिनियोजन गरेको थियो ।
