इटहरी । कोसी प्रदेशका विभिन्न जिल्लाहरूबाट नियन्त्रित लागूऔषध ब्राउनसगुरसहित १० जनालाई प्रहरीले पक्राउ गरेको छ ।
कोसी प्रदेश प्रहरी कार्यालय विराटनगरको अनुसन्धान समूहबाट खटिएको प्रहरी टोलीले मोरङको सुन्दरहरैँचा नगरपालिका ९ सलकपुरबाट स्थानीय २६ वर्षीय मोहमद अस्लाम र २५ वर्षीय महेश ठाकुरलाई ९५० मिलिग्राम लागूऔषध ब्राउनसुगरसहित पक्राउ गरेको हो ।
यसैगरी झापाको अर्जुनधारा नगरपालिका ११ बसपार्कबाट अर्जुनधारा नगरपालिका १० का ३० वर्षीय विक्रम लिम्बू र फिदिम नगरपालिका १ का ३४ वर्षीय मदन मगर ३६ ग्राम लागूऔषध ब्राउनसुगर, डिजिटल तराजु १ थान र नगद २ हजार ५३० सहित पक्राउ गरेको प्रहरीले जनाएको छ ।
झापाकै भद्रपुर नगरपालिका ७ बाट स्थानीय ३७ वर्षीय अजित बिश्वकर्मालाई २ ग्राम १२० मिलिग्राम लागूऔषध ब्राउनसुगरसहित पक्राउ गरिएको छ ।
बिश्चकर्माको साथबाट प्रहरीले ३ थान डिजिटल तराजु र बिभिन्न कम्पनीका १६ थान मोबाइल समेत बरामद गरेको प्रहरीले जनाएको छ ।
यसैगरी इलामको इलाका प्रहरी कार्यालय पशुतिनगरबाट खटिएको प्रहरी टोलीले इलाम नगरपालिका ९ का २७ वर्षीय निशान खवास, फाकफोकथुम गाउँपालिका १ का २५ वर्षीय विमल लिम्बू र सन्दकपुर गाउँपालिका ४ का २७ वर्षीय निशान गुरुङलाई १९ ग्राम ३३० मिलिग्राम लागूऔषध सहित पक्राउ गरेको छ ।
झापाबाट मोटरसाइकलमा इलामतर्फ जाँदै गरेका उनीहरूलाई इलामको छिपिटारमा चेकजाँच गर्ने क्रममा उक्त परिणामको ब्राउनसुगर, लागूऔषध ट्याब्लेट १० ट्याब्लेट, ६ बट्टा र ६ थान मोबाइल समेत बरामद गरेको छ ।
यसैगरी भोजपुर नगरपालिका ६ का ३८ वर्षीय सन्तोष बराईली टेम्केमैयुम गाउँपालिका ३ बाट १ ग्राम ९७० मिलिग्राम लागूऔषध ब्राउनसुगरसहित पक्राउ गरिएको छ।
विशेष सूचनाको आधारमा जिल्ला प्रहरी कार्यालय भोजपुरबाट खटिएको प्रहरी टोलीले बराईलीलाई आइतबार बिहान पक्राउ गरेको प्रहरीले जनाएको छ ।
यता, मोरङको केराबारी गाउँपालिका ६ कालापानीबाट स्थानीय २७ वर्षीय विधान राईलाई लागूऔषध ट्याब्लेटसहित प्रहरीले पक्राउ गरेको छ ।
इलाका प्रहरी कार्यालय केराबारीबाट खटिएको प्रहरी टोलीले राईलाई स्सपेन १६० पिस र ट्रमाडोल १६० पिस गरी जम्मा ३२० पिस ट्याबलेट प्रतिबन्धित औषधीसहित पक्राउ गरेको हो ।
पक्राउ परेका उनीहरूको सम्बन्धित प्रहरी कार्यालयहरूबाट थप अनुसन्धान भइरहेको प्रहरीले जनाएको छ ।
