इटहरी । कोसी प्रदेश प्रहरी कार्यालय विराटनगरको अनुसन्धान समूहबाट खटिएको प्रहरी टोलीले विभिन्न मुद्दाका दुई जना फरार प्रतिवादीलाई पक्राउ गरेको छ ।
लागूऔषध तथा अन्य मुद्दामा उच्च अदालत विराटनगरको मिति २०७३/०२/०७ गतेको सजाय निर्धारण फैसला आदेशले १ वर्ष ६ महिना कैद र नगद १ लाख रुपैयाँ र मिति २०७५/०३/१५ गतेको सजाय निर्धारण फैसला आदेशले १ वर्ष १० दिन कैद र नगद ९८ हजार रुपैयाँ जरिवाना बेरुजु रही फरार रहेका भोक्राहा गाउँपालिका ४ सुनसरी घर भइ धरान उपमहानगरपालिका १७ फोक्ल्यान्ड बस्दै आएका २८ वर्षीय सदाम अन्सारी र लागूऔषध मुद्दामा मोरङ जिल्ला अदालतको मिति २०७९/११/२१ गतेको सजाय निर्धारण फैसला आदेशले ११ महिना १९ दिन कैद र ५ हजार रुपैयाँ जरिवाना रही फरार रहेका विराटनगर महानगरपालिका ४ का २२ वर्षीय दीपेन्द्र कुमार मण्डल धानुकलाई गाउँघरमा नै लुकिछिपी बसेको अवस्थामा फेला पारी पक्राउ गरेको हो ।
पक्राउ परेका अन्सारीलाई सुनसरी जिल्ला अदालतमा दाखिला गरेकोमा अदालतले कैद भुक्तानको लागि झुम्का कारागार सुनसरी पठाएको छ भने धानुकलाई मोरङ जिल्ला अदालतमा दाखिला गरेकोमा तोकिएको कैद भुक्तानको लागि जिल्ला कारागार मोरङ पठाइएको प्रहरीले जनाएको छ ।
