सुनसरी । सुनसरी क्षेत्र नम्बर ४ को मतगणना रोकिएको छ । केही मत नेकपा एमालेकोमा जोडेको कांग्रेसले आरोप लगाउँदै विरोध गरेपछि गणना रोकिएको हो ।
निर्वाचन अयोगले ६ सय ६ मत एमालेकोमा जोडेपछि विरोध भएको थियो । विरोधपछि सो विषय समाधानसहित अझ प्रभावकारी रुपमा कसरी मतगणना गर्ने भन्ने विषयमा सर्वदलीय बैठक बसिरहेको सहायक निर्वाचन अधिकृत मोहन बहादुर अधिकारीले जानकारी दिए ।
सो क्षेत्रमा प्रतिनिधिसभा सदस्यका लागि नेपाली कांग्रेसका ज्ञानेन्द्र बहादुर कार्की र नेकपा एमालेका जगदिश प्रसाद कुसियतबीच कडा प्रतिष्पर्धा भइरहेको छ । सुरुवाती अग्रता कार्कीले लिएपनि बीचमा दुबैजनाले एकपछि अर्काे गर्दै अग्रता लिइरहेका छन् ।
पछिल्लो मत परिणाम अनुसार कार्कीले झिनो मतले अग्रता लिएका छन् । अहिलेसम्म ६० हजार ६ सय ३२ मतगणना हुँदा उनले २३ हजार ७९ मत प्राप्त गरेका छन् । त्यस्तै एमालेका कुसियैतले २३ हजार ८ मत प्राप्त गरेका छन् ।
अधिकारीका अनुसार हालसम्म ३२ वडामध्ये २२ वटावडाको मत गणना भइसकेको छ ।
