इनरुवा । सुनसरीको हरिनगर गाउँपालिकाले कोरोना संक्रमित व्यक्तिहरुलाई राख्नका लागि ५० शैयाको आइसोलेशन केन्द्र सञ्चालन गरेको छ ।
हरिनगर गाउँपालिका कार्यपालिकाको बुधबार बसेको आकस्मिक बैठकले हरिनगर –१ स्थित भुटाहा जेनेरल हस्पिटल भुटाहामा ५० शैयाको आइसोलेशन केन्द्र सञ्चालनमा ल्याएको हो ।
हरिनगर गाउँपालिकाका प्रशासन अधिकृत सुजन ढुङ्गेलद्धारा हस्ताक्षरित सूचनामा वैशाख १७ गतेबाट हरिनगर –१ स्थित भुटाहा जेनेरल हस्पिटल भुटाहामा आइसोलेशन केन्द्र सञ्चालनमा ल्याएको उल्लेख गरिएको छ ।
सुनसरीको दक्षिणवर्ती क्षेत्र हरिनगर , देवानगंज र बर्जु गाउँपालिकाका कोरोना संक्रमित व्यक्तिहरुको संख्या पछिल्लो एक साता यता बढेपछि हरिनगर गाउँपालिकाले ५० शैयाको आइसोलेशन केन्द्र हरिनगर गाउँपालिकाले सञ्चालनमा ल्याएको छ ।
हरिनगर गाउँपालिका लगायत आसपास क्षेत्रका जनताको सेवा गर्ने उद्देश्यले आइसोलेशन केन्द्र सञ्चालनमा ल्याएको र बाहिर ठाउँको अभाव रहेकोले यस क्षेत्रमा विगत वर्ष झै यस वर्षमा पनि केन्द्र सञ्चालनमा ल्याएको प्रशासन अधिकृत सुजन ढुङ्गेलले बताए ।
‘हरिनगर गाउँपालिकाका अध्यक्ष गफार अन्सारीले जनताको सेवा गर्नु धर्म हो,’ उनले भने, ‘कोरोनाको समयमा जनतालाई बचाउनु नै मेरो सफलता हो । यस क्षेत्रका संक्रमितलाई अन्यत्र लैजानु नपर्ने र समयमै आइसोलेशनमा राखी थप उपचार गरी घर फर्काउन लागि परेको छु ।’
हरिनगर गाउँपालिकाका प्रमुख प्रशासकीय अधिकृत भक्तबहादुर खड्काले हरिनगर –१ स्थित भुटाहा जेनेरल हस्पिटलमा भएको संरचनालाई प्रयोग गरी पुनस् अक्सिजन सहितको आइसोलेसन केन्द्र सञ्चालन गर्ने निर्णय भएको बताए । उनका अनुसार आइसोलेशन केन्द्रमा आपत्तकालिनका लागि पाँच थान अक्सिजन सिलिण्डरको पनि व्यवस्था गरिएको छ ।
