बराहक्षेत्र । सुनसरीको बराहक्षेत्र नगरपालिकाले गत आर्थिक वर्ष २०७७/७८ को बजेटमा ८२.१४ प्रतिशत खर्च गरेको छ । संघीय, प्रदेश र आन्तरिक स्रोत गरि गत वर्ष नगरपालिकाको कुल बजेट १ अर्ब २ करोड ८ लाख ५८ हजार ५ सय ३५ रुपैयाँ रहेको थियो ।
जसमा नगरपालिकाले असार ३१ गतेसम्म ८३ करोड ८६ लाख ८४ हजार ९ सय ७० रुपैयाँ खर्च गरेको छ । कुल बजेटको ८२.१४ प्रतिशात खर्च भएको लेखा अधिकृत बिरेन्द्र यादवले बताए ।
जसमा नगरपालिकाले आर्थिक विकास क्षेत्रमा ८ करोड ५८ लाख ५१ हजार ८० रुपैयाँ रहेकोमा खर्च ६१.९६ प्रतिशत भएको छ । सामाजिक विकास क्षेत्रमा ४७ करोड २० लाख ५९ हजार ८ हजार ८४ रुपैयाँ रहेकोमा ८८.०५ प्रतिशत खर्च गरेको छ ।
पूर्वाधार विकास क्षेत्रमा २८ करोड ४५ लाख ६२ हजार १ सय ७८ रुपैयाँ मध्ये ७६.५३ प्रतिशत खर्च भएको छ । सुशासन तथा अन्तर सम्बन्धि क्षेत्रमा ५ करोड ९८ लाख ३८ हजार ३ सय ९३ रुपैयाँमा ८१.४५ प्रतिशत र कार्यालय संचालन तथा प्रशासनिक क्षेत्रमा ११ करोड ८५ लाख ४७ हजारमा ८७.१ प्रतिशत खर्च गरि कुल बजेटको ८२.१४ प्रतिशात खर्च भएको यादवले बताए ।
यादवका अनुसार कोरोना भाइरसको कारणले गर्दा बिनोयोजित बजेटमा १८ करोड २२ लाख ५० हजार १ सय २५ रुपैया खर्च हुन पाएन । यस नगरमा बेरुजु कति छ ? भन्ने खबरबिटको प्रश्नमा लेखा अधिकृत यादवले आर्थिक वर्ष २०७३/७४ देखिनै बेरुजु हुँदै आएको जवाफ दिए । उनले अहिलेसम्म यस नगरपालिकामा ७ करोड ९४ लाख ७२ हजार महालेखाले बेरुजु देखिएको र अझै बेरुजु घटाउन लागि परेकाे बताए । उनले बेरुजु ३,४ किसिमको हुने भएको हुँदा यो बेरुजु अनियमितता बेरुजु नभएको स्पस्ट पारे ।
