बराहक्षेत्र । किसान कल्याण बचत तथा ऋण सहकारी संस्था इटहरीले आफ्नो २० औं वार्षिक साधारणसभा शनिबार (आज) सुरु गरेको छ ।
शनिबार बराहक्षेत्रको सेवा इकाई केन्द्र बाङगे, चतरा सेवा केन्द्र र राजावास सेवा केन्द्रले साधारण सभा सम्पन्न गरेको छ । केन्द्रीय कार्यालयको निर्देशन बमोजिम आज तीन सेवा केन्द्रमा सम्पन्न भएको छ भने बाँकी सेवा केन्द्रमा आगामी सोमबार, बुधबार र बिहीबार (६, ८ र ९ मंसिर) साधारणसभा हुने छ ।
संस्थाले अन्य वर्ष केन्द्रीय कार्यालय इटहरीमा मात्र साधारणसभा गर्दै आएको थियो भने यसपटक प्रत्येक इकाई केन्द्रमा साधारणसभा गर्न थालिएको इकाई केन्द्र बाङ्गेका संयोजक साथै संचालक समिति सदस्य महेश कुमार रेग्मीले बताए । रेग्मीले संस्थाको प्रगति विवरण समेत प्रस्तुत गरेका थिए ।
कार्यक्रममा संस्थाको वार्षिक प्रगति प्रतिवेदन संस्थाका सचिव थिरबहादुर खड्काले प्रस्तुत गरेका थिए । जसमा सेयर सदस्य १४ हजार ६ सय २, बाल बचतकर्ता २५ सय ९७ जना र ज्येष्ठ नगरिक बचत ६ सय ९० गरी कुल संख्या १७ हजार ८ सय ८९ जना रहेको संस्थाले जनाएको छ ।
बचत ७० करोड ६० लाख ७८ हजार ५ सय ३ रुपैयाँ र ऋण वितरण ७० करोड ९ लाख ५७ हजार ६ सय २३ रुपैयाँ रहेको संस्थाले जनाएको छ । सेयर वितरण ९ करोड २७ लाख ८३ हजार ९ सय रहेको खड्काले बताए ।
संस्थाले दुई दर्जन भन्दा बढी जेष्ठ नागरिक सेयर सदस्यहरुलाई दोसल्ला र समानपत्रले सम्मान समेत गरेको छ । संस्थाको केन्द्रीय कार्यालयसहित ७ वटा सेवा केन्द्रमा जम्मा ४७ जना कर्मचारी रहेको छन् ।
