भरतपुरको नयाँ मेडिकल कलेज अगाडि भेटिएको शंकास्पद वस्तु सेनाले निष्क्रिय पारेको छ । करिब २ बजेर ४० मिनेटतिर देखिएको उक्त शंकास्पद वस्तुलाई सेनाको टोलीले ४ बजेर ४५ मिनेटमा निष्क्रिय पारेको हो ।
एक जनाले स्कुटरमा आएर छाडेको उक्त शंकास्पद वस्तुलाई भरतपुर ब्यारेकको सेनाको टोलीले निष्क्रिय पारेको चितवनका प्रमुख जिल्ला अधिकारी असमान तमाङले बताए । डिस्पोज गर्दा उक्त वस्तु बम नभएको पाइएको छ ।
चितवन प्रहरी प्रमुख एसपी नवराज अधिकारीले उक्त वस्तु तर्साउने नियतले राखिएको पाइएको बताए।
‘उक्त वस्तु के हो यकिन गरिएको छैन। विज्ञहरूले अनुसन्धान गरेपछि मात्र थाहा हुन्छ’, उनले भने, ‘तर्साउने नियतले राखिएको पाइएको छ।’
पूर्व–पश्चिम राजमार्गमा शंकास्पद वस्तु फेला परेपछि प्रहरीले दुईतर्फी नै सवारी साधन रोकेर उक्त वस्तु डिस्पोज गर्ने काम थालेको थियो । अहिले भने यातायातका साधनलाई आवत–जावतका लागि राजमार्ग खुल्ला गरिसकेको छ ।
