सुनसरी । भारतमा जारी विधानसभा चनावमा सत्तारुढ दल भारतीय जनता पार्टी(भाजपा) फेरि एकपल्ट गुजरात सरकारमा आउने भएको छ । यही डिसेम्बर १ र ५ गरी दुई चरणमा भएको गुजरात विधानसभा चुनावको नतिजा बिहीबार आउने क्रम जारी छ ।
मतगणनाको सुरुवाति परिणामअनुसार भाजपा अत्याधिक बहुमतसहित पुनः सत्तामा आउने देखिएको छ । सन् १९९५ देखि गुजरातमा भाजपाले सरकार चलाउँदै आएको छ ।
हालसम्मको विधानसभा चुनावमा भाजपाले सन् १९९५ देखि गुजरातमा राज्यसरकार बनाउदै सरकारमा रहेको छ । सन् २००२ देखि १२ बर्षसम्म वर्तमान प्रधानमन्त्री नरेन्द्र मोदी मुख्यमन्त्री बनेका थिए ।
पछिल्लो समय दिल्ली र पञ्जाबमा प्रभाव देखाएको आम आदमी पार्टी(आप) ले गुजरातमा पनि भाजपालाई टक्कर दिने अनुमान गरिए पनि नतिजामा भने देखिएन । आम आदमी पार्टी (आप)ले पूर्वपत्रकारसमेत रहेका इसुदान गढवीलाई मुख्यमन्त्रीका रूपमा उतार्दै चुनावी प्रतिस्पर्धामा उत्रिएको थियो ।
भारतीय चुनाव आयोगका अनुसार अहिलेसम्म गुजरातमा ५ स्थानमा जित हात पारिसकेको सत्तारुढ भाजपाले १५० भन्दा बढी सिटमा अग्रता बनाएको छ । त्यस्तै कांग्रेसले १ सिटमा जित हात पारेको छ भने १५ सिटमा अग्रता राख्न सफल भएको छ । आप भने ५ सिटमा मात्र अगाडि रहेको छ ।
१८२ सदस्यीय गुजरात विधानसभामा सरकार बनाउन ९२ सिट चाहिन्छ । पछिल्लो पटक सन् २०१७ को चुनावमा भाजपाले ९९ सिट जितेर सरकार बनाएको थियो । कंग्रेस भने ७७ सिट जित्दै सशक्त प्रतिपक्षका रूपमा उभिएको थियो । पछिल्लो चुनावको नतिजा हेर्दा गुजरातमा कंग्रेसले ठूलो क्षति बेहोर्ने देखिन्छ ।
गुजरातमा भाजपाले पश्चिम बंगालमा भारतीय कम्युनिस्ट पार्टी(माक्र्सवादी) को रेकर्डसँग बराबरी गर्ने भएको छ । सीपीआईएमले सन् १९७७ देखि २०११ सम्म लगातार ७ पटकसम्म विधानसभा चुनाव जितेर रेकर्ड कायम गरेको थियो ।
विपक्षमा कंग्रेस र आपबीच भोट बाँडिएकाले त्यसको लाभ सत्तारूढ भाजपालाई पुगेको राजनीतिक विश्लेषकहरूको भनाइ छ । अर्काेतर्फ प्रधानमन्त्री मोदी र गृहमन्त्री अमित शाहको गृह प्रदेशमा भाजपाले आफ्नो सत्ता कायम राख्न पूरा शक्ति लगाएको थियो ।
