सुनसरी । रामधुनी नगरबासीहरुका लागि आँखा तथा कानको सेवा सहज गर्न आजबाट उपचार केन्द्र स्थापना भएको छ ।
रामधुनी नगरपालिका तथा विराटनगर आँखा अस्पतालको संयुक्त सहकार्यमा स्थापना गरिएको उक्त केन्द्रबाट विहान १० बजेदेखि बेलुकी ४ बजेसम्म सेवा प्राप्त गर्न सकिने उपचार केन्द्रले जनाएको छ ।
रामधुनी नगरपालिकाको १ नं. वडा स्थित रहेको भासी स्वास्थ्य चौकीमा नगरप्रमुख शंकरलाल चौधरी तथा बिराटनगर आँखा अस्पताल प्रमुख पदम नारायण चौधरीको उपस्थितिमा विधिवत रुपमा स्थापना गरेर बुधबारबाट यसको सेवाको सुरुवात भएको स्वास्थ्य शाखाले जनाएको छ ।
खबरबिटसंग कुरा गर्दै स्वास्थ्य शाखा इन्चार्ज नगेन्द्र पोडेलले नगरबासीहरुको आँखा तथा कानको उपचारका लागि विराटनगर, इटहरी, धरान जाने समस्यालाई समाधान गर्न उक्त केन्द्र स्थापना गरिएको बताए ।
‘सामान्य उपचारका लागि धरान, विराटनगर जाने समस्यालाई समाधान गर्न उक्त केन्द्र स्थापना गरिएको हो’ पौडेलले भने ।
आँखा तथा कानका रोगीहरुको समस्यालाई समाधान गर्ने उद्देश्यका साथ स्थापना गरिएको उक्त केन्द्रबाट आँखाको जाँच, दृष्टिको अवस्था, कानमा देखा पेरका समस्या, शैलयकृया बाहेकका सेवाहरु सुचारु गरिएको नगरपालिका स्रोतले जनाएको छ ।
उक्त उद्घाटन कार्यक्रममा रामधुनी नगरपालिकाका प्रमुख, प्रमुख प्रशासकिय अधिकृत कमल बहादुर थापा, स्वास्थ्य शाखाका इन्चार्ज तथा कर्मचारी साथै वडाध्यक्ष महेश कुमार चौधरी, लगायतको उपस्थिति रहेको थियो ।
उक्त उद्घाटन कार्यक्रमलाई सम्बोधन गर्दै नगरप्रमुख शंकरलाल चौधरीले रामधुनीमा स्थापना भएको यस केन्द्रले रामधुनी बासीको आँखा र कान जाँचका लागि अन्य ठाँउमा जाने समस्या समाधान गर्ने बताएका छन् ।
उक्त केन्द्रमा बिराटनगर आँखा अस्पतालका विशेषज्ञ डाक्टर तथा प्राविधिकहरुको सेवा तथा न्यूनतम शुल्कमा सेवा प्राप्त गर्न सकिने स्वास्थ्य शाखा इन्चार्ज पौडेलले जानकारी दिए ।
खबरबिटसंगको कुराकानीका क्रममा इन्चार्ज पौडेलले नगरबासीहरुलाई आँखा तथा कानको सेवा विशेषज्ञ डाक्टर तथा प्राविधिकहरुबाट न्यूनतम शुल्कमा सेवाहरु प्रदान गरिन बताएका हुन् ।
साथै आर्थिक अवस्था कमजोर भएकाहरुलाई पनि विशेष सहुलियतको व्यवस्था गरिने समेत जानकारी दिए ।
