सुनसरी । बराहक्षेत्र वडा ५ कालाबन्जरमा कात्तिक पहिलो साता भएको आगलागीमा पीडित दुई परिवार लाई स्थानिय विभिन्न संघ, संस्था र व्यक्तिहरु सहितले कुल १ लाख, ८७ हजार, ८ सय ३० रुपैयाँ आर्थिक सहयोग प्रदान गरेको छ ।
त्यस मध्ये भोजपुरे होटेलमा आगलागि भएका पीडित देबबहादुर कार्कीलाई १ लाख ८० हजार रुपैयाँ र किराना पसल आगलागी हुँदा पीडित गोविन्द विष्टले ७९ हजार ८३० रुपैयाँ आर्थिक सहयोग प्राप्त गरेका हुन् । गत कात्तिक ५ गते मंगलबार राति आगलागी भएको थियो ।
बराहक्षेत्रमा दमकल भएपनि चालक नहुँदा निभाउन नससकिएको र बाहिरबाट दमकल आउँदा सम्म दुवै पसल र होटलको धनमाल जलेर नष्ट भएको थियो ।
आगलागी पीडित द्वयका लागि सोमबार बराहक्षेत्र उद्योग वाणिज्य संघ महेन्द्रनगरले उपाध्यक्ष ४१ हजार ५ सय १ रुपैयाँ आर्थिक सहयोग हस्तान्तरण गरेको छ । छिमेकी हिमालय किराना पसलमा पनि आगिलागी भएर लाखौं क्षति भएको हुँदा संघको सदस्य नभए पनि मानवीय सम्बन्ध भएको हिसाबले २२ हजार ८ सय ३० रुपैयाँ आर्थिक सहयोग प्रदान गरेको छ ।
संघको बराहक्षेत्र नगर कार्यसमिति, स्थानीय लगायतको उपस्थितिमा उक्त रकम हस्तान्तरण गरिएको हो । यसैगरी खुसी सहकारी र मुन बिम स्कुलले किराना पसल र भोजपुरे होटेललाई सहकारीले १० हजारको दरले र स्कुलले ५ हजारका दरले सहयोग हस्तान्तरण गरेको सहकारीका व्यवस्थापक दुर्गाबहादुर बस्नेतले बताए ।
बिनायक कृषि सहकारी संस्थाका शेयर सदस्य रहेको भोजपुरे होटललाई ५१ हजार र अर्का साधारण सदस्य गोविन्द बिष्टलाई १५ हजार रुपैयाँ नगद सहयोग गरेको छ । जगन्नाथ डेडराज जनता माध्यमिक बिद्यालयका कर्मचारी देबबहादुर कार्कीलाई स्कुलका विद्यार्थी तथा शिक्षक लगायतले सहयोग स्वरुप ५२ हजार ५ सय रुपैयाँ आर्थिक सहयोग गरेका छन् ।
साथै बराहक्षेत्र नेकपाबाट १० हजार र मिना कटुवालबाट ५ हजार र चन्द्र प्रतिभा क्लबबाट ५ हजार रुपैयाँ सहयोग पाएको भोजपुरे होटेलका सञ्चालक कार्कीले बताए । यस्तै हिमालय किराना पसललाई चन्द्रप्रतिभा क्लबबाट ५ हजार छिमेकीहरुबाट १५ हजार र घिमिरे बिष्ट बन्धुहरुबाट ७ हजार सहयोग पाएको बिष्टले बताए ।
विष्टले अहिलेसम्म संघ संस्था छिमेकीहरुबाट मात्र सहयोग आएको तर सरकारी निकायबाट भने अहिलेसम्म कुनै सहयोग प्राप्त नभएको बताए ।
