सुनसरी । सुनसरी प्याब्सनद्वारा शुक्रबार आयोजित जिल्ला स्तरीय नृत्य प्रतियोगिताको उपाधि बराहक्षेत्र नगरपालिका ३ मा रहेको स्काइ इङलिस स्कुलले पाएको छ ।
दोस्रो स्थान पनि बराहक्षेत्र ९ स्थित राजाबास इङलिस स्कुलले हात पारेको छ । जिल्ला स्तरीयमा प्रथम हुने स्काइ र द्धितिय हुनेराजाबास बराहक्षेत्र प्याब्सनले केही दिन अघि आयोजना गरेको बराहक्षेत्र नगरस्तरीय प्रतियोगताको क्रमशः बिजेता र उपविजेता विद्यालय हुन् । तेस्रो स्थान हिमशिखर इङिलस स्कुल तरहरा र सान्तवना विश्व आदर्श स्कुल इटहरीले हात पारेको कार्यक्रम संयोजक कृष्ण तामाङले बताए ।
प्रतियोगितालाई बराहक्षेत्र ५ मा रहेको सिद्धार्थ मेमोरियल इङलिस स्कुलले होस्ट गरेको थियो । प्याब्सन सुनसरीले पहिलोपटक ग्रामिण क्षेत्रमा प्रतियोगिता सञ्चालन गरेको हो ।
जिल्लाका स्थानीय तह, गाउँपालिका, नगरपालिका तथा उपमहानगरमा भएका प्रतियोगितामा प्रथम र द्धितीय हरु मध्ये १५ वटा विद्यालयले सहभागिता जनाएको प्याब्सन सुनसरीका जिल्ला सचिव बिजय राईले बताए ।
जिल्ला सुनसरी प्याब्सन अध्यक्ष बिष्णु कोइरालाको सभापतित्व रहेको उक्त कार्यक्रममा नेपाल प्याब्सन केन्द्रीय सल्लाहकार शंखर थापाको प्रमुख आतिथ्यता रहेको थियो । प्याब्सन केन्द्रिय कार्य समिति सदस्य जीवप्रसाद गुरागाई, प्याब्सन प्रदेश नम्बर १ कार्य समिती प्रदेश उपाध्यक्ष ज्ञानेन्द्र दाहाल, प्रदेश सचिव सुमित थापा, प्रदेश लेखा संयोजक नरबहादुर थापा, प्रदेश सचिवालय सदस्य निश्चलराज शाक्य, प्रदेश सदस्य धनबहादुर लिम्बुलगायतको विशेष आतिथ्यता रहेको थियो ।
बराहक्षेत्र न.पा.बाट स्काई इङलिस स्कुल र राजाबास सेकेण्डरी स्कुल, इनरूवा न.पा.बाट सूर्य किरण एकेडेमी, नवयुग एकेडेमी, पिसियस एकेडेमी र इनरूवा इङिलस स्कुल, रामधुनी न.पा.बाट लर्डबुद्ध एकेडेमी र आरम्भ विद्या मन्दिर, इटहरी उपमहानगरपालिका हिमशिखर इङिलस स्कुल, लिटल फ्लावर इङिलस स्कुल र विश्व आदर्श स्कुल सहभागी भएका छन् ।
त्यसैगरी धरान उपमहानगरबाट सेन्ट जोसेफ बोर्डिङ स्कुल र आवर स्मल हेभन इङ्लिस स्कुल, दुहवी नगरपालिकाबाट महेन्द्र मेमोरियल इङिलस स्कुल र कोशी पालिकाबाट समिप स्टार इङलिस स्कुल सहभागी भएका थिए ।
उक्त कार्यक्रममा प्रथम हुने बराहक्षेत्र ३ नडाहाका स्काइ इङलिसले चाँदिको रनिङ सिल पाएको छ । दोस्रो हुने बराहक्षेत्र ९ राजाबास इङलिस स्कुल सिल्ड, तेस्रो हुने हिमशिखर इङलिस र सान्तवना हुने विश्व आदर्श इटहरीले ट्रफी, मेडल र प्रमाणपत्र पाए ।
प्रतियोगितमा विधागत तर्फ उत्कृष्ट अनुशासितमा विश्व आर्दश विद्यालयलाई, उत्कृष्ट कोरियाेग्राफी हिमशिखर इङलिस स्कुल, उत्कृष्ट भेषभुषा आरम्भ विद्या मन्दिर रामधुनी र उत्कृष्ट प्रतिभामा विश्व आदर्श इटहरी घोषित भए ।
सुनसरी जिल्ला प्याब्सनमा आवद्ध २ सय ७२ वटा विद्यालयमध्ये उक्त प्रतियोगितामा सुनसरी भित्रका ९६ वटा निजि विद्यालय सहभागी थिए । जसबाट जिल्ला स्तरीयका लागि १५ विद्यालय छानिएको र सोही १५ विद्यालयबीच प्रतिस्पर्धा गराइएको कार्यक्रम संचालक तथा जिल्ला सचिव राईले बताए ।
