निशान प्रकृति थारु, रामधुनी । सुनसरी-मोरङ सिचाई नहरको डिलमा अव्यवस्थित तरिकाले खुला रुपमा मासु पसल सञ्चानलमा रहेको छ ।
रामधुनी १ मा राँगा र सुँगुरको मासु अव्यस्थित तरिकाले खुल्ला रुपमा राखेर बिक्री गर्दा उपभोक्ताहरुको स्वास्थ्यमा असर परिरहेको छ ।
व्यापारीले खुल्ला रुपमा मासु बिक्री गर्दा झिँगा, धुलो, धुवाँ मिसिँएको मासु बेचिरहेको उपभोक्ताहरु बताउँछन् । स्वास्थ्य जस्तो अति सम्वेदनशील विषयमा ब्यापारीले ध्यान दिनुपर्ने उनीहरुको भनाइ छ ।
जथाभावी रुपमा राँगा र सुंगुर काट्दा निस्किने फोहोर सिधै नहरको पानी मिसिएको छ । त्यसरी फोहोर जन्यपदार्थ पानीमा मिसाउँदा पशुजन्य चौपाया र मावन स्वास्थ्यमा असर पुग्ने स्थानीय बताउँछन् ।
स्थानीय रमेश चौधरीका अनुसार झुम्का बजारका केही व्यापारीले कुखुराको सुली, प्वाक साथै होटलबाट निस्केका फोहोर, सडेगलेका खानेकुरा सिधै नहरको पानीमा फाल्ने गरेका छन् । नगरपालिका वा सम्बन्धीत निकायले जथाभावी फोहोर फाल्नेलाई कारबाही गर्नुपर्ने र व्यापारीले मानव स्वास्थ्यमा ध्यान दिनुपर्ने चौधरीले बताए ।
सुनसरी–मोरङ सिचाई अन्तरगत चतरा नहरको पानी करिब आधा दर्जन नगरपालिका तथा गाउँपालिकावासीहरुले प्रयोग गदै आइरहेकोले फोहोर जन्यपदार्थ ढलको रुपमा मिसाउँदा रोग लाग्ने सम्भावना रहेको स्थानीयहरुको भनाइ छ ।
खुला रुपमा बिक्री वितरण भइरहेको मासु पसललाई छिट्टै व्यवस्थित गर्र्ने रामधुनी नगरपालिका मेयर जयप्रकाश चौधरी जानकारी दिएका छन् ।
