सुनसरी । खोटाङको बराहपोखरी गाँउपालिका वडा १ बाराहा, हाल इटहरी उपमहानगरपालिका १७ पकलीको कान्छीचोक निवासी मुना श्रेष्ठले क्यान्सर पीडित आफ्ना श्रीमान् पूर्णकुमार श्रेष्ठको उपचारका लागि सहयोगको याचना गरेकी छन् ।
उनका २८ वर्षीय श्रीमान् पूर्णकुमार श्रेष्ठलाई केही समय पहिले ब्लड क्यान्सर भई सिभिल अस्पताल काठमाडौंमा पहिलो चरणका उपचार भइ अहिले फलोअप भइरहेको परिवारले जनाएको छ । पूर्णरुपले निको हुन भने बाँकी छ ।
घरको आर्थिक अवस्था कमजोर तथा देशमा रोजगारीको अभावको कारणले धन कमाउने आशामा खाडीमुलुक पुगेका श्रेष्ठलाई घाँटीमा समस्या आई त्यहीको स्थानीय अस्पतालमा परीक्षण गरएको थिए । चिकित्सकले क्षयरोगको आशंका गरेको र उपचार गर्ने क्रममा कुनै सुधार नभएपछि घर फर्किएको पीडित श्रेष्ठले बताए । कम्पनीले आउन नदिएपनि जोखिम मोलेर नेपाल फर्किएको र काठमाडौंस्थित सिभिल अस्पतालमा पहिलो चरणमा परीक्षण गराउँदा अस्पतालले ब्लड क्यान्सर पुष्टि गरेको उनको भनाइ छ ।
खाडी मुलुक पुगेको १६ महिना पुगेको र सोही समयमा उनी बिरामी भएका थिए । आर्थिक अवस्था कमजोर भएकाले क्यान्सर पीडित श्रीमानको उपचारमा थप समस्या भएको श्रीमती मुना श्रेष्ठले बताइन् । ‘श्रीमानलाई ऋण खोजेर विदेश पठाएकी थिएँ तर रोग बोकेर आउनुभयो,’ उनले भनिन्, ‘पहिलो चरणको उपचार त गरियो तर अब बाँकी उपचार कसरी गर्ने भन्ने चिन्ता परेको छ ।’
विभिन्न व्यक्ति, साथीभाइ तथा आफन्तहरुले सहयोग तथा घरपरिवारमा भएको गरी पहिलो चरणमा करिब ६ महिनासम्म उपचार गर्दा लगभग २० लाख खर्च भएको उनको भनाइ छ । “हरेक ३/३ महिनामा फलोअपमा मा जाँदा प्रत्येक पटक करिब ३५ हजार रुपैयाँ खर्च लाग्ने उनले बताइन् । डाक्टरको सल्लाह तथा सुझावले बिरामीको मनोबल बढेकोले सहयोगी मनहरुले सहयोग गरिदिए उपचारमा सहज हुने उनको भनाइ छ ।
सिभिल अस्पतालका बरिष्ठ क्यान्सर रोग विशेषज्ञ डा. विशेष शर्मा पौडेलले अन्तिम चरणसम्म उपचार गर्न सके रोग पूर्णरुपले निको हुनसक्ने सम्भावना अत्यधिक रहेको र सो उपचारका लागि अस्पतालमा मात्र अझै कम्तिमा १५ लाख रुपैयाँसम्म लाग्न सक्ने अस्पताललाई उद्धृत गर्दै उनले बताइन् ।
२८ वर्षका श्रेष्ठको उपचारमा भएको र विदेशबाट कमाएको मात्र नभइ विभिन्न दाताहरुले गरेको सहयोग समेत पहिलो चरणको उपचारमा सकिएको हुँदा यतिबेला बढी आर्थिक संकट परेको र उपचारमा समस्या भएको मुनाले बताइन् ।
सहयोग गरिदिए आफू निको भई सामान्य जीवनमा फर्किने पूर्णकुमार श्रेष्ठको भनाइ छ । एक सानी छोरीका मातापिता श्रेष्ठ दम्पत्तिलाई उपचारका लागि आर्थिक कठिनाई रहेकाले सहयोग गर्न चाहनुहुने सहयोगी व्यक्ति तथा संघसंस्थाहरुले पूर्ण श्रेष्ठको मोबाइल नम्बर ९८१८६१८३१८/९८६५५५००७५ मा सम्पर्क गर्न र मेगा बैंकमा पूर्णकुमार श्रेष्ठको नाममा रहेको खाता नम्बर ००५००५०१८३३५६ मा रकम जम्मा गरिदिन सक्ने पीडितकी श्रीमती मुनाले बताइन् ।
