इटहरी। मोरङका छुट्टाछुट्टै दुई स्थानबाट प्रतिबन्धित लागुऔषध ब्राउन सुगरसहित दुई जनालाई प्रहरीले पक्राउ गरेको छ ।
सोमबार (आज) दिउँसो १२ बजे विराटनगर महानगरपालिका १५ ढाट स्थितमा लागुऔषध नियन्त्रण ब्युरो बिराटनगरबाट खटिएको प्रहरी टोलीले मोटरसाइकलमा लागुऔषध फेला पारेको थियो । सो टोलीले भारतबाट नेपाल तर्फ आउँदै गरेको प्रदेश १-०४-००१ प ८६५१ नम्बरको मोटरसाईकललाई चेक गर्दा मोटरसाईकल चालक धरान उप-महानगरपालिका ५ सुनसरीका २९ वर्षीय उज्वल हल्वाईको साथबाट १.७२ ग्रामब्राउन सुगर फेला पारी पक्राउ गरेको हो ।
त्यस्तै इलाका प्रहरी कार्यालय रानीबाट चेक गर्नका लागि खटिएको प्रहरी टोलीले विराटनगर महानगरपालिका १६ दरैयामा भारतबाट नेपाल तर्फ आउँदै गरेको को ३१ प ६६५३ नम्बरको मोटरसाइकल चालक ट्याम्केमैयुम गाँउपालिका २ भोजपुरका ३४ वर्षीय प्रबिन राईको साथबाट ०.२२ ग्राम ब्राउनसुगर फेला पारी पक्राउ गरेको हो ।
लागुऔषध ब्राउन सुगरसहित पक्राउ परेका दुबैजनाको सम्बन्धमा थप अनुसन्धान भइरहेको इलाका प्रहरी कार्यालय रानीले जनाएको छ ।
