इटहरी । पछिल्लो समय कोसी प्रदेश नामकरणको विषयलाई लिएर पहिचानवादी समुहहरूले विभिन्न ठाउँमा हिंसात्मक आन्दोलन गर्न सुरु गरेका छन् ।
केही दिन अघि विराटनगरको प्रदर्शनपछिका दिनमा विभिन्न स्थानका पालिका तथा वडाहरुमा तालाबन्दी गर्दै आएको थियो । तालाबन्दी सँगै शुक्रबारबाट केही समुहहरुले हिंसात्मक आन्दोलन सुरु गरेका छन् । आज बिहान इटहरी २० नम्बर वडा कार्यालयमा तोडफोड गरिएको छ । बाक्लो संख्यामा भेला भएका पहिचान पक्षधरहरूले वडा कार्यालयको झ्यालका सिसा र डिजिटल बोर्ड तोडफोड गरेका छन् ।
कार्यबाहक वडाध्यक्ष तनुज गुरुङका अनुसार तालाबन्दी गर्न आएकाहरूसँग छलफल गरेर ताला लगाएपछि एक्कासी तोडफोडमा उत्रिएका थिए । ‘वडा कार्यालयमा सुरुमा ताला लगाइएको थियो, त्यो बेला हामी बाहिरै निस्कियौं’ उनले भने, ‘हामी तल झर्दै गर्दा एक्कासी झ्यालको सीसा, डिजिटल बोर्डमा समेत तोडफोड गरियो ।’
यस्तै, तरहरा प्रहरी चौकीको ना १ झ ६२० नम्बरका प्रहरीको गाडी समेत तोडफोड गरिएको छ । वडा कार्यालयमा प्रहरीको गाडी पुुग्नेबित्तिकै आन्दोलनकारीहरूले प्रहरीको गाडी तोडफोड गर्न थालेका हुन् । ढुंगामुढाले प्रहार दुई जना प्रहरी सामान्य घाइते समेत भएको गुरुङले बताए ।
धरानमा छाप जलाइयो, ताला लगाइयो
बिहीबार एक समुहले धरान उपमहानगरपालिकाको कार्यालयमा तालाबन्दी गरेपछि विवाद समेत भएको थियो । करिब साढे ११ बजे ताला लगाइएको र कार्यालयको केही छाप समेत जलाइएको थियो । सबै कर्मचारीलाई बाहिर निकालेर ताला लगाएपछि र केह िछाप जलाउन थालेपछि बाहिर निस्किएको सूचना अधिकारी ध्रुव अधिकारीले बताए । पछि प्रहरी आएर ताला खुलाएको थियो । सोही कारणले शुक्रबार समेत सेवा प्रवाह प्रभावित बनेको उनको भनाई छ ।
त्यस्तै बिहीबार नै बराहक्षेत्र नगरपालिका वडा नम्बर ३ को कार्यालयमा समेत केही बेर ताला लगाइएको थियो । प्रदेशको नाम पहिचानको आधारमा राखिनुपर्ने भन्दै एक समुह वडाकार्यालय पुगेर ताला लगाएको हो । केही दिन अघि इटहरी उपमहानगरपालिकाको कार्यालयमा समेत नाराबाजी गर्दै ताला लगाइएको थियो ।
पछिल्लो समय प्रदेशको नाम पहिचानको आधारमा राखिनुपर्ने भन्दै पहिचान पक्षधरहरूले आन्दोलनका गतिविधिमा सक्रिय हुन थालेका छन् ।
