इटहरी । इटहरीको एक मासु पसलमा बासी र गलेको मासु बिक्री गर्ने गरेको भेटिएपछि उपमहानगरले ताला लगाएको छ । सोमबार बजार अनुगमनका क्रममा बिपी चोकस्थित बत्सु मिट सेन्टरले बासी र गलेको मासु बिक्रीका लागि राखेको र सो मासु खान अयोग्य भेटिएपछि ताला लगाएको हो ।
सोमबार नगरप्रमुख हेमकर्ण पौडेलसहितको अनुगमन टोलीले मिठाई पसल र मासु पसलमा अनुगमन गरेको थियो । अनुगमनका क्रममा बासी र सडेगलेका मिठाई र मासु बिक्री गर्ने गरेको भेटिएको छ । अधिकांश मिठाई पसलमा बिक्रीका लागि राखेका मिठाई तथा अन्य खाद्यवस्तुमा झिँगा भन्किएको, किरा परेको भेटिएको थियो ।
इटहरीको मुख्य बजारमै सञ्चालनमा रहेको नटराज मिठाई पसलमा म्याद गुज्रिएका खानेकुरा समेत भेटिएको छ । सामानको म्याद हेर्न थालेपछि सञ्चालकले हतार हतार म्याद गुज्रिएको सामान मिल्काएका थिए । पछि सञ्चालकले माफी मागेका थिए । उनको पसललाई कानुनी कारबाही अगाडि बढाइने उपमहानगरले जनाएको छ ।
अनुगमन टोलीले इटहरीका विष्णु मिष्ठान्न भण्डार, नटराज मिठाई पसल, हिरा होटल, सगुन स्विट्स, बालाजी मिठाई पसल लगायतका मिठाई पसलको अनुगमन गरेको थियो ।
बासी र सडेगलेका सामग्री बिक्रीका लागि राखेको, झिँगा र किरा परेका खाद्यपदार्थ बिक्रीका लागि राखेको पाइएपछि ती खाद्यान्न नष्ट गरी सञ्चालकलाई कानुनी कारबाही अगाडि बढाइएको नगर प्रमुख हेमकर्ण पौडेलले बताए । बजार अनुगमन चाडपर्व केन्द्रित मात्र हुने गरेको गुनासो बढेपछी अनुगमनलाई निरन्तरता दिएको पौडेलले बताएका छन् ।
