बराहक्षेत्र । कोरोना संक्रमितको उपचारका लागि आर्थिक अभाव भएपछि उपचारका लागि बराहक्षेत्र नगरपालिकाका प्रशासकीय अधिकृत मनुकुमार लिम्बुको पहलमा रकम संकलन गरिएकाे छ । सुनसरीको बराहक्षेत्र नगरपालिका वडा नम्बर ११ मधुवन निवासी बर्ष ५२ का राजकुमार महतोलाई उपचार गर्न आर्थिक अभाव भएपछि सोमबार रकम संकलन गरिएकाे हाे ।
महतोलाई गत जेष्ठ १० गते कोरोना पोजेटिभ भएको थियो । उनी बराहक्षेत्र नगरपालिकाबाट संचालित आइसोलेशनमा उपचारत रहेका छन् । थप उपचार गर्न सुबिधा सम्पन्न अस्पतालमा तुरुन्त लैजानुपर्ने भएको र उनको परिवारको आर्थिक अवस्था अत्यन्तै नाजुक भएकोले उपचार गर्न कठिन भएको स्वास्थ्यकर्मी साथै आसोलेसनमा कार्यरत अहेब प्रमोद यादबले बताए ।
महतोलाई थप उपचार गर्न परिवारले नसक्ने देखिएपछि नगरपालिकाकै कर्मचारीहरूसँग रकम संकलन गरेकाे लिम्बुले बताए । लिम्बुका अनुसार सोमबारबाट संकलन सुरु गरेको र पहिलोदिन नगरपालिका भित्रबाट २० हजार रुपैयाँ भन्दा बढी रकम संकलन भएको थियो । नगरपालिकाको विपत् व्यवस्थापन कोषबाट अरु थप सहयोग गर्ने नगर प्रमुख निलम खनालले प्रतिवद्धता जनाएको अहेब यादबले बताए । यादवका अनुसार महतोलाई अहिले उपचार गर्न धरान स्थित बिजयपुर हस्पिटलमा भर्ना गरिएको छ ।
महतोलाई बचाउन आफ्नो आफ्नो ठाउँबाट सक्ने आर्थिक सहयोग गर्न समेत प्रशासकीय अधिकृत लिम्बुले अनुरोध समेत गरेका छन् । त्यस्तै उनको परिवारले पनि सहयोग अपिल गरेको छ ।
