हरिनगर। सुनसरीको हरिनगर गाउँपालिका(१स्थित भुटाहामा रहेको आइसोलेशन सेन्टरलाई एसजी अर्गनाइजेशन प्रा.लि.ले अक्सिजनसहित स्वास्थ्य सामग्री हस्तान्तरण गरेको छ ।
भुटाहा जेनेरल हस्पिटलमा सुनसरीको चार गाउँपालिकाको संयुक्त रुपमा आइसोलेशन सेन्टर संचालनमा रहेको छ।
उक्त आइसोलेशन सेन्टरमा हरिनगर, भोक्राहा नरसिंह, देवानगंज र बर्जु गाउँपालिकाको साझेदारी रहेको हरिनगर गाउँपालिकाका अध्यक्ष गफार अन्सारीले जानकारी दिएका छन् ।
दोश्रो चरणको कोरोना महामारी बेला मानव स्वास्थ्यको ख्याल गरी एसजी अर्गनाइजेशन प्रा.लि.ले हरिनगरका आइसोलेशन सेन्टरलाई अक्सिजन व्याग ५० थान, सर्जिकल मास्क ५ सय, ४० लिटरको अक्सिजन सिलिन्डर ७ थान, १० लिटरको अक्सिजन सिलिन्डर २ थान, अक्सिजन मास्क २० थान, ओसीमिटर ४ थान हस्तान्तरण गरेको प्रा.लि.ले जनाएको छ ।
अर्गनाइजेशनका अध्यक्ष शिवप्रसाद घिमिरेले हरिनगर गाउँपालिकाका अध्यक्ष गफार अन्सारीलाई अक्सिजन सहित स्वास्थ्य सामग्री हस्तान्तरण गरेका हुन् ।
कोरोना महामारीको बेला अक्सिजन अभावले कोरोना संक्रमितको ज्यान गइरहेकोले आफूले सर्वसाधारणको ज्यान बचाउनका लागि सामग्री उपलब्ध गराएको घिमिरेले बताए ।
हरिनगर गाउँपालिकाका अध्यक्ष अन्सारीले कोरोनाको महामारीको यस्तो परिस्थितीमा सामग्रीहरु उपलब्ध गराएकोमा एसजीका अध्यक्ष घिमिरेलाई धन्यवाद ज्ञापन गरेका छन् ।
