रामधुनी । सुनसरीको रामधुनी नगरपालिकामा कार्यरत अनावश्यक कर्मचारी तत्काल निष्काशन गर्न नेकपा माओवादी केन्द्रले निर्देशन दिएको छ । शुक्रबार माओवादी केन्द्र रामधुनी नगर कमिटीले एक विज्ञप्ति जारी गर्दै यस्तो निर्देशन दिएको हो ।
पछिल्लो समय नगरपालिकामा कर्मचारीको विषयमा विवाद भइरहेको छ । नगरप्रमुख जयप्रकाश चौधरीले कर्मचारी बढी नभएको र प्रशासकीय अधिकृत ओमकारप्रसाद न्यौपानेले कर्मचारी धेरै भएको अभिव्यक्ति दिएसँगै विभिन्न पार्टी तथा समुहले यतिबेला चासोका साथ लिइरहेका छन् ।
बिहीबार बसेको रामधुनीको नगर सभामा नगरपालिकाका प्रमुख प्रशासकिय अधिकृत ओमकारप्रशाद न्यौपानेले ‘५८ जना कर्मचारी हुनुपर्नेमा रामधुनीमा १ सय २५ जना कार्यरत रहेको’ बताएका थिए । उनले त्यति मात्रै भनेनन्, करार र ज्यालादारीमा राखिएका कतिपय कर्मचारी मिल्दै नमिल्ने पदहरुमा राखिएको समेत बताएका थिए ।
यसअघि नै नेकपा माओवादीले रामधुनीमा अनावश्यक कर्मचारी रहेको र त्यस्ता कर्मचारी राखेर राजनीतिक दलले नगरपालिकालाई आफ्ना कार्यकर्ताको भर्तिकेन्द्र बनाउन खोजेको आरोप लगाएको थियो ।
न्यौपानेले नगर सभामा नै ५८ जना कर्मचारी हुनुपर्नेमा १ सय २५ जना कार्यरत रहेको भन्दै ६७ जना कर्मचारी अनावश्यक भएको स्वीकारेका थिए ।
