रामधुनी । नेपाल तरुण दल रामधुनी नगर कार्यसमितीले मंगलबार रक्तदान कार्यक्रम गरेको छ । नेपाली कांग्रेसका संस्थापक विश्वेश्वर प्रसाद कोइरालाको ३९ औं स्मृति दिवसको अवसरमा झुम्कामा बुधबार रक्तदान गरेको हो ।
रक्तदान कार्यक्रममा करिब ८० पिन्ट रगत संकलन भएको नगर समितिले जनाएको छ । तरुण दल रामधुनीले गत वर्षहरुमा पनि रक्तदान कार्यक्रम गरि विपीलाई सम्झदैँ आएको र यस पटक ८ औ रक्तदान कार्यक्रम आयोजना गरिएको नेपाल तरुण दल रामधुनी सभापति नगेन्द्र गुरुङले बताए ।
झुम्कास्थित कुबेर सपिङ सेन्टर अगाडि आयोजना गरिएको उक्त कार्यक्रममा प्रमुख अतिथिका रुपमा नेपाली कांग्रेस सुनसरी जिल्ला सभापति तथा प्रदेश १ संसदिय दलका नेता राजिव कोइराला रहेको थिए ।
विशिष्ट अतिथिका रुपमा नेपाल तरुण दल सुनसरी जिल्ला सभापति सिजन गुरुङको उपस्थिति रहेको थियो ।
विपि कोइरालाको त्याग र संघर्ष नेपालको लागि अविस्मरणीय रहेको र नेपालमा प्रजातन्त्र स्थापित गर्न उनले गरेको योगदान चाहेर पनि भुल्न नहुने र नसकिने प्रमुख अतिथी राजिव कोइरालाले बताए । विपिको विचार र विकासका योजनाहरु श्रमजीवी कृषकदेखि गरिब, निमुखाहरुलाई जोड्ने किसीमको रहेकाले नै नेपाली कांग्रेसले समाजवादको सिद्धान्त अंगाल्दै आएको उनको भनाइ थियो ।
नेपाल रेडक्रस सोसाइटीको सहयोगमा सम्पन्न भएको रक्तदान कार्यक्रममा नेपाली कांग्रेस जिल्ला सचिव केदार भण्डारी, नगर सभापति सुदिप अधिकारी लगायत अन्य नेताहरुको समेत उपस्थिति रहेको थियो ।
विक्रम संवत १९७१ साल भदौमा भारतको वनारसमा जन्मिएका विपीको २०३९ साल साउन ६ गते अर्थात आजकै दिन निधन भएको थियो ।
