रामधुनी । सुनसरीको रामधुनी ५ झुम्कामा रहेको आरम्भ विद्या मन्दिरले बुधबार अभिभावक दिवस सम्पन्न गरेको छ । झुम्का क्षेत्रमा छुट्टै पहिचान स्थापित गरेको आरम्भले कल्पवृक्ष पार्टी प्यालेसमा अभिभावक दिवस मनाएको हो ।
विद्यार्थीहरुको क्षमता प्रस्फुटन गर्ने उद्देश्यका साथ आयोजना गरिएको कार्यक्रममा विद्यार्थी, अभिभावक र शिक्षकहरुको सहभागिता रहेको थियो । विद्यार्थीहरु सुवासना पौडेल, सविया रेग्मी, रिकेश न्यौपाने, प्रनिश अधिकारी, सन्देश थापा र अविनास पोखरेल गरी ६ जनाले बेलाबेलामा उद्घोषकको भूमिका निर्वाह गरेका थिए । कार्यक्रममा विद्यार्थीहरुले नृत्य, गीत, कथा, कवितागायतका प्रतिभाहरु प्रस्फुटन गरेका थिए । कलालय इटहरीको संयोजनमा नाटक समेत प्रस्तुत गरिएको थियो ।
कार्यक्रमका विशेष अतिथी रहेका रामधुनी नगरपालिका शिक्षा शाखा प्रमुख राजन गेलालले नगरशिक्षा शाखाले विद्यालयहरुले शिक्षाको गुणस्तर कस्तो बनाउँदैछन् भनेर नजिकबाट नियाली रहेको र आरम्भको प्रगति राम्रो भएको बताए । उनले आगामी वर्षबाट कक्षा ८ सम्मको शिक्षा प्रदान गर्ने लक्ष्य लिएको आरम्भलाई आफूहरुले अनुमति दिने घोषणा गरे ।
कार्यक्रममा अतिथि समेत रहेका रामधुनी नगर प्याव्सनका अध्यक्ष अच्युत ढकालले पढाईमात्रै नभएर अतिरित्त क्रियाकलाप पनि उत्तिकै आवश्यक रहेको र आरम्भका विद्यार्थीले देखाएको अतिरिक्त क्रियाकलापको प्रस्तुती एकदमै राम्रो भएको बताए । विद्यालयले आगामी दिनमा अझ उत्कृष्ट कार्यक्रमहरु आयोजना गरी नाटकसँग अभिभावकलाई जोड्ने उद्घोषक सहजकर्ता समेत रहेका आरम्भका एकडेमिक डाइरेक्टर हरि रायमाझीले बताए ।
कार्यक्रममा विद्यालयका प्रिन्सिपल बिमल बरालको सभापतित्व रहेको थियो ।
