रामधुनी । स्थानीय तह निर्वाचनमा युवा संलग्नता, स्वतन्त्र उमेद्वारी र यसले राजनीतिमा पर्ने प्रभावका विषयमा अन्तरक्रिया सम्पन्न भएको छ । कलेज अन्तर्गत आन्तरिक गुणस्तर सुनिश्चितता समितिको आयोजनामा भएको कार्यक्रममा शिक्षक तथा विद्यार्थीहरुले आफ्ना विचार राखेका थिए ।
हालै सम्पन्न स्थानीय तहको निर्वाचनमा युवाको सहभागिता कस्तो रह्यो ? स्वतन्त्र रुपमा युवाको उमेद्वारी किन र कसरी पर्यो ? यसले भावी दिनमा कस्तो प्रभाव पर्छ र चुनौतीहरु के के हुन्छन् ? लगायतका विषयमा अन्तरक्रिया गरिएको थियो ।
कार्यक्रमका सभापति समेत रहेका कलेज प्रमुख धर्म न्यौपानेले नयाँ पुस्ताले राजनीतिमा चासो लिएर भोलीका दिनमा नेतृत्व लिनुपर्ने आवश्यकता रहेको बताए ।
त्यस्तै सहभागी विद्यार्थी होमिका श्रेष्ठले पछिल्लो समय युवा तथा मतदाताहरुमा समेत राजनीतिक दलप्रतिको वितृष्णा भएकाले पछिल्लो समयको चुनावी नतिजा आएको बताइन् । उनले अब जनताले परम्परागत रुपमा भोट हाल्ने र नेता चुन्ने विधिको समाप्त गरेर स्वःविवेक प्रयोग गरेकाले यस स्थानिय निकायको निर्वाचनमा जनताले गतिलो छाप छाडेको बताइन्।
अन्तरक्रिया कार्यक्रममा पत्रकारिता विषयका प्राद्यापक कुलदीप भुजेलले बक्ताका रुपमा आफ्ना भनाई प्रस्तुत गरेका थिए । कलेजको हलमा सञ्चालित सो कार्यक्रममा विद्यार्थीहरुले समेत विभिन्न विषयमा आफ्ना धारणा प्रस्तुत गरेका थिए ।
