नेकपा एमालेले आगामी पाँच वर्षमा गर्ने महत्वाकांक्षी योजना समेटिएको घोषणापत्र मंगलबार सार्वजनिक गरेको छ । घोषणापत्रमार्फत एमालेले ५ वर्षमा गरिछाड्ने २० काम स्पष्ट पारेको छ । यस्तै कामका ३० क्षेत्र र २४७ प्राथमिकता पनि छुट्याएको छ । अध्यक्ष केपी शर्मा ओलीले डिजिटल प्रविधिबाट आसन्न प्रतिनिधिसभा र प्रदेशसभा निर्वाचनका लागि पार्टीको घोषणा प्रविधिबाट सार्वजनिक गरेका हुन् ।
घोषणा पत्रमा पार्टीले अघि सारेको ‘समृद्ध नेपालः सुःखी नेपाली’को राष्ट्रिय संकल्पलाई निरन्तरता दिइएको छ । करिब २० हजार शब्द रहेको घोषणा पत्रमा मुलुकको समृद्धिका लागि राष्ट्रिय अर्थतन्त्रको निर्माणमा जोड दिइएको छ । घोषणा पत्रमा सूर्य चिन्हमा किन मतदान गर्ने भन्ने कुरालाई प्रस्ट्याउने प्रयास गरिएको बताइएको छ ।
नेकपा एमालेले सुशासन, विकास, समृद्धि र समानता कायम गर्ने विषयलाई उच्च प्राथमिकतामा राखेको छ । ३० वटा कार्यक्रम र अल्लिो पटकको ४१ महिनाको अवधि रहेको नेकपा (एमाले)को सरकारले गरेको प्रमुख कामका रुपमा दृश्टान्त सहितका ८२ वटा माइलस्टोन पनि घोषणापत्रमा समावेश गरिएको नेकपा (एमाले)ले जनाएको छ । ५ बर्षको घोषणापत्र एमालेका लागि ५ बर्षिय मार्गनिर्देशक हुने एमालेको दाबी छ ।
मंगलबार चुनावी घोषणापत्र सार्वजनिक गर्दै एमालेले अब बन्ने आफ्नो नेतृत्वको सरकार देश र जनताको हित र सेवामा समर्पित हुने भन्दै सुशासन र शान्ति सुरक्षालाई सुदृढ बनाउने दावी गरेको छ । नेपालभित्रको जुनसुकै भौगोलिक क्षेत्रमा बसोवास गर्ने नेपालीलाई राज्यले उपलब्ध गराउने नागरिकता, राष्ट्रिय परिचयपत्र, सवारीसाधन दर्ता र सवारी चालक अनुमतिपत्र, घरजग्गा लगायतका सम्पत्तिको खरिद बिक्री कर, विद्युत, खानेपानी लगायतका सरकारी शुल्क तथा कर बुझाउने र स्वास्थ्य तथा कृषि प्राविधिक लगायतका सेवाहरू अनलाइन प्रणालीबाट उपलब्ध गराइने एमालेले जनाएको छ ।
‘सार्वजनिक कार्यालयबाट सम्मानजनक व्यवहार र निष्पक्ष सेवा शीघ्र उपलब्ध गराइनेछ । राज्यका सम्पूर्ण संयन्त्रलाई देश र जनताको सेवा गर्ने कर्तव्य पुरा गर्न केन्द्रित गरिनेछ । सरकारको प्रभावकारिता वृद्धि गर्ने र राष्ट्रिय जीवनका सबै क्षेत्रमा सुव्यवस्था र सुशासन कायम गरिनेछ’, एमालेले भनेको छ ।
कार्यसम्पादन र योग्यता प्रणालीलाई सार्वजनिक प्रशासन सञ्चालनको आधार बनाउने जनाएको एमालेले राष्ट्रसेवकहरूलाई सम्मानजनक जीवन निर्वाहका लागि आवश्यक पारिश्रमिक तथा सुविधा उपलब्ध गराउने जनाएको छ । नेपाली सेनालगायत सबै सुरक्षा निकायहरूको क्षमता विकास गरिने घोषणापत्र बनाएको एमालेले स्रोत, साधन र आधुनिक सुरक्षा सामग्रीहरूको व्यवस्था मिलाउँदै सुरक्षा निकायहरूलाई दक्ष, व्यावसायिक र उच्च मनोबलयुक्त बनाइने दावी गरेको छ ।
त्यस्तै एमालेले सङ्घीयता कार्यान्वयनको अनुभव समेतका आधारमा निजामती सेवालगायत सम्पूर्ण सार्वजनिक क्षेत्रको पुनरावलोकन गरी सार्वजनिक क्षेत्रमा रूपान्तरणकारी सुधार गर्ने प्रतिवद्धता जनाएको छ । ‘समृद्ध नेपालका लागि प्रभावकारी सार्वजनिक सेवा’ लाई प्रशासन सुधारको मूल आदर्श मानिनेछ’, एमालेले भनेको छ, ‘नेपाल सरकारका सङ्घीय तथा प्रदेश सरकारका मन्त्रीहरूको कार्यसम्पादनको सार्वजनिक परीक्षण गर्ने व्यवस्था प्रारम्भ गरिनेछ । यस परीक्षणको पृष्ठपोषणका आधारमा मन्त्रीहरूको निरन्तरता र जिम्मेवारी हेरफेरको निधो गर्ने प्रचलनको विकास गरिनेछ ।’
त्यस्तै अख्तियारको दुरुपयोग, राष्ट्रिय तथा सरकारी स्रोत साधनको दोहन र भ्रष्टाचारप्रति निर्मम, कठोर र शून्य सहनशीलताको नीति अपनाइने जनाएको छ । एमालेले सरकारी सम्पत्तिको दुरुपयोग र अपचलन गर्ने जुनसुकै व्यक्तिलाई कानुनी कारबाहीको दायरामा ल्याउने बताएको छ ।
‘भ्रष्टाचार र अख्तियारको दुरुपयोगसँग जोडिएका विषयको छानबिन अनुसन्धान गरी कुनै पनि कालखण्डमा भएका भ्रष्टाचार र जोकोही भ्रष्टाचारी उपर कानुनी कारबाही अगाडि बढाइने छ । भ्रष्टाचारी एकदिन कानुनको कठघरामा पुग्नेछ भन्ने विश्वास नेपाली समाजमा स्थापित गरिनेछ’, एमालेको भनाइ छ ।
सरकारी जग्गा अतिक्रमण गर्नेहरुविरुद्ध छानबिन अनुसन्धान तदारुकताका साथ अगाडि बढाउने जनाएको एमालेले दोषीलाई कानुन बमोजिम दण्डित गरिने उल्लेख गरेको छ । त्यस्तै नेपाल ट्रस्ट र सरकारको नाममा रहेको जमिन र सम्पत्ति सरकारको स्वामित्वमा ल्याउने घोषणा गरेको छ ।
