नेकपा एमाले प्रदेश १ कमिटीले प्रदेश नामकरणलाई मुख्य एजेन्डा बनाउँदै २६ वटा प्रतिबद्धतालाई समाबेस गरको घोषणापत्र सार्वजनिक गरेको छ । “स्वच्छ सुखी सम्मुनत प्रदेश” मुल नाराका साथ घाेषणापत्र नेकपा एमाले प्रदेश कमिटीले सार्वजनिक गरेकाे हाे ।
एमालेले प्रदेशको नामकरण गरी अत्याधुनिक सुविधासहितको प्रदेश राजधानीको भौतिक संरचना बनाउने प्रतिबद्धता जनाएको छ । प्रदेश १ लाई आत्मनिर्भर प्रदेश बनाउने र नेपालको संविधानले प्रदेशलाई दिएका अधिकारहरूलाई प्रदेश सरकारअन्तर्गत ल्याउने एमालेको मुख्य एजेण्डा छ । एमालेले औद्योगिक नगरी विराटनगरलाई आर्थिक राजधानीमा रूपान्तरण गर्ने दाबी गरेको छ ।
प्रदेश सरकारका मन्त्रालयबाट दिइने सेवाहरू जिल्ला–जिल्लाबाटै प्रदान गर्ने व्यवस्था गर्ने र शासन प्रणालीमा सुशासन, पारदर्शिता र आर्थिक अनुशासन कायम गर्ने र आफ्नो घोषणापत्रमा भएका पर्यटन, जलस्रोत, हवाई सेवा, गरिबी निवारण राजगारी सहितका २६ प्रतिबद्धतालाई ५ बर्ष भित्रमा पूरा गर्ने लक्ष्य एमालेको छ ।
यस्तै पहाडी र हिमाली जिल्लामा विभिन्न अवसर सिर्जना गरेर बसाइसराइको दर घटाउने, हिमालय पर्वत शृङ्खलामा छोटो मार्गबाट पर्यटक र्पुयाइ आम्दानी बढाउने प्रतिबद्धता उल्लेख गरिएको छ ।
एमालेले कोसी नदी प्रणाली र यसको पानीलाई बहु उपयोगमा ल्याउने, प्रदेश १ लाई नेपालको महत्त्वपूर्ण प्रवेशद्वारका रूपमा विकास गर्ने यस्तै विराटनगर विमानस्थललाई शीत भण्डारसहितको क्षेत्रीय अन्तर्राष्ट्रिय विमानस्थल बनाउने, प्रदेशस्तरीय खुला चिडियाघर सञ्चालन गरिने प्रतिबद्धता एमालेको छ ।
