निर्वाचन आयोगले सामाजिक संजालमा चलेका “लौरो अभियान” काठमाडौं महानगरपालिकाका मेयर बालेन्द्र शाहसँग जवाफ माग गरेको छ । उक्त अभियानले सामाजिक संजालमा मेयर शाहको तस्बिर प्रयोग गरेकोबारे आयोगले जवाफ मागेको हो ।
आयोगले शनिबार मेयर शालाई पत्र लेखिएको छ । उक्त पत्रमा, “हाम्रो नेपाली पार्टीका विभिन्न निर्वाचन क्षेत्रका उम्मेदवारहरूले जाय लौरो नामक फेसबुक पेज समेतबाट लौरो अभियान सञ्चालन गरेको र त्यसमा बालेनको साथ छ भन्ने समेतका व्यहोरा उल्लेख गरी प्रचारप्रसार गरेको पाइएको छ । उक्त हाम्रो नेपाली पार्टीका विभिन्न क्षेत्रका उम्मेदवारहरूलाई यसपूर्व नै आयोगले निजहरू स्वतन्त्र उम्मेदवार नभई दलका उम्मेदवार रहेको र निजहरूले आफू स्वतन्त्र उम्मेदवार भनी प्रचारप्रसार गर्न नमिल्नेबारे गराइसकेको छ ।”
निर्वाचन आयोगले उक्त सन्दर्भमा मेयर शाहसँग जवाफ मागेको विषय हो “यहाँको उक्त दलसँग कुनै आबद्धता नै रहे भएको जस्तो गरी यहाँको तस्बिर र नाम निरन्तर प्रयोग भै रहेको विषयमा आयोगको ध्यानाकर्षण भई यो पत्र लेख्ने कार्य भएको हो ?”
पार्टीका उम्मेदवार बनेर किन स्वतन्त्र भनी प्रचारप्रसार भइरहेको हो भन्नेबारे आयोगले हाम्रो नेपाली पार्टीका अध्यक्ष अनन्तराज घिमिरेलाई स्पष्टीकरण सोधेको छ । आफ्नो दलीय आबद्धता स्पष्ट नगरी आफूलाई बालेनको साथ छ, लौरोको विजय निश्चित छ भनी प्रचार गर्ने कार्यमा पहिल्यै रोक लगाउँदा पनि जारी राखेको भन्दै आयोगले मेयर शाहसंग स्पष्टीकरण सोधेको हो ।
आयोगले आचारसंहिता उलंघन गरेकाले जरिवाना किन नगर्नु पर्ने हो भनेर २४ घण्टे स्पटीकरण सोधेको हो । त्यसो नगरेमा कानुनबमोजिम कारबाही हुने पनि आयोगले सचेत गराएको छ ।
