उदयपुर जिल्लाको उदयपुरगढी गाउँपालिका- ७ अधेरीस्थित सडकमा स ८ प ४२४ नम्बरको मोटरसाइकल अनियन्त्रित भई शुक्रबार दिउँसो दुर्घटना हुँदा चालक सिन्धुली फिक्कल गाउँपालिका-६ बस्ने ३५ वर्षीय तेजकुमार राईको मृत्यु भएको छ ।
दुर्घटनामा गम्भीर घाइते भएका उनको जिल्ला अस्पताल गाईघाटमा उपचारको क्रममा मृत्यु भएको हो ।
यस्तै, झापाको मेचिनगर नगरपालिका १५ स्थित सडकमा रोकेर राखेको ना २ ख ८७९९ नम्बरको ट्रकमा मे १ ख ६०५ नम्बरको ट्रक ठक्कर हुँदा मे १ ख ६०५ नम्बरको ट्रकको सहचालकको मृत्यु भएको छ ।
उक्त घटनामा २० वर्षीय अनमोल कार्कीको मृत्यु भएको प्रहरीले जनाएको छ । प्रहरीका अनुसार दुर्घटनामा गम्भीर घाइते भएका उनको बिएण्डसी अस्पताल बिर्तामोडमा उपचारको क्रममा मृत्यु भएको हो ।
दुर्घटनापछि मे १ ख ६०५ नम्बरको ट्रकका चालकलाई प्रहरीले नियन्त्रणमा लिएको छ । दुवै दुर्घटनाका सम्बन्धमा प्रहरीले थप अनुसन्धान गरिरहेको जनाएको छ ।
