नेकपा एकीकृत समाजवादीले सोमबार ४ गते हुने प्रतिनिधि सभा र प्रदेश सभा सदस्य निर्वाचनका लागि चुनावी घोषणापत्र सार्वजनिक गरेको छ । घोषणापत्रको नीतिगत प्रतिबद्धतामा संविधान र व्यवस्थाको रक्षा तथा हालको निर्वाचन प्रणाली परिवर्तनमा जोड दिएको छ ।
अहिलेको निर्वाचन प्रणाली अत्यन्त खर्चिलो र विकासका निम्ति बाधक भएकाले यसको विकल्प खोज्नुपर्ने पार्टीको भनाई छ । त्यस्तै सार्वजनिक सेवा प्रवाहमा सुधार, उद्योग धन्दाको विकास,कृषि, पर्यटन, शिक्षा, स्वास्थ्य र सिँचाइमा जोड दिनेगरी घोषणापत्र तयार गरेको सो पार्टीले पूर्व–पश्चिम महानहर निर्माण गर्ने विषयलाई प्राथमिकतामा राखेको छ ।
नेकपा समाजवादीले मुख्य ८ वटा नीतिगत प्रतिवद्धता र ५४ वटा कार्यक्रमिक प्रतिवद्धतासहितको घोषणापत्र ल्याएको हो । आठ नीतिगत प्रतिवद्धतामा प्राप्त उपलव्धिको रक्षा र विस्तार, लोकतन्त्रको सुदृढिकरण र विकास, निर्वाचन प्रणालीमा सुधार,सुशासन र पारदर्शिता,आत्मनिर्भर अर्थतन्त्रमा जोड, आर्थिकसामाजिक रुपान्तरण : सामाजवादका आधार निर्माण र योजना प्रणालीमा आमुल परिवर्तन लगायत रहेका छन् ।
त्यसैगरी नेकपा (एकीकृत समाजबादी)ले ५४ कार्यक्रमिक प्रतिवद्धतामा आधुनिक कृषि र सम्पन्न किसान पहिलो प्राथमिकतामा राखेको छ । ‘किसानलाई सम्पन्न बनाउने कृषि उत्पादकत्वमा वृद्धि गरेर नै हो । कृषि पूर्वाधारमा ठुलो मात्रामा लगानी गरी कृषिको आधुनिकीकरण, यान्त्रिकीकरण र व्यावसायिकरण तथा कृषि यन्त्र, मल, बिउ,प्रविधिको सहज उपलब्धता र कृषि उत्पादकत्व वृद्धिमा हाम्रो जोड रहने छ । सम्पूर्ण कृषिभूमिमा सुपर जोन, जोन, ब्लक र पकेट स्तरका आधुनिक फार्महरूको विकास गरी माटो अनुकूल एउटै बाली उत्पादनमा जोड रहने छ’, घाेषणापत्रमा उल्लेख छ ।
त्यसैगरी संरक्षित कृषि बजार, किसानको जीवनमा बहार, भूमिको वैज्ञानिक व्यवस्थापन, सिञ्चाईमा लगानी–कृषियोग्य जमिनमा पानी, राष्ट्रको पहिचान पर्यटन विकास र संस्कृति संवर्द्धन, घरेलु, ग्रामीण, साना तथा मझौला उद्योग : आत्मनिर्भरताको प्रयोग, एकीकृत योजनाबद्ध भौतिक पूर्वाधार र यातायात, सहरी तथा एकीकृत वस्ती विकास, समृद्ध नेपालको आधार, ऊर्जा उत्पादनमा वृद्धि : राष्ट्रको आर्थिक समृद्धि, सडक पूर्वाधार : आर्थिक समृद्धिको आधार,गुणस्तरीय शिक्षा र शैक्षिक पूर्वाधार : राष्ट्र निर्माणको आधार,निःशुल्क स्वास्थ्य उपचार : जनताको मौलिक अधिकार, निःशुल्क खानेपानी : सुखी जिन्दगानी, स्वस्थ जीवनको आधार : खेलकुदका पूर्वाधार, विज्ञान–प्रविधि र आविष्कार : आर्थिक–सामाजिक रूपान्तरणको मूल आधार, हवाई तथा जलमार्ग लगायत रहेका छन् ।
