आगामी ४ मंसिरमा हुने प्रदेश तथा प्रतिनिधिसभाको निर्वाचनमा लोकतान्त्रिक–बाम गठबन्धनका उम्मेदवारलाई विजयी गराउन निर्वाचन परिचालन कार्यालयको सोमबार (आज) इटहरीकाे बालग्राममा उद्घाटन गरिएको छ ।
प्रतिनिधिसभा सदस्यका उम्मेदवार नेपाली कांग्रेसका नेता सीताराम मेहताले कार्यालयको उद्घाटन गरे । केहीदिन अघि नेपाली कांग्रेस सुनसरी क्षेत्र नं. २ (क) का सभापति सुबेक्छु देवान राईको संयोजकत्वमा २,५०१ सदस्यीय निर्वाचन परिचालन समिति गठन गरिएको थियो । सोही समितिले निर्वाचन परिचालन कार्यालय निर्माण गरेको हो ।
कांग्रेस क्षेत्र नं. २ (क) का सचिव चिन्तामणि सापकोटाका अनुसार सुनसरी क्षेत्र नं. २ मा प्रतिनिधिसभातर्फ नेपाली कांग्रेसका तर्फबाट सीताराम मेहता उम्मेदवार छन् भने प्रदेशसभातर्फ माओबादी केन्द्रबाट द्वारिकलाल चौधरी उम्मेदवार छन् ।
कार्यक्रममा सम्बोधन गर्दै नेताहरूले संविधानको रक्षाका निम्ति बनेको लोकतान्त्रिक–बाम गठबन्धनलाई निर्वाचित गराउन सबै निकायबाट सहयोग आवश्यक रहेको बताएका थिए । कार्यक्रममा गठबन्धनबाट सुनसरी २ (क) बाट प्रदेशसभा सदस्यका उम्मेदवार द्वारिकलाल चौधरी लगायतका नेताहरूको उपस्थिति रहेके थियो ।
