रामधुनी । कोरोना संक्रमणबाट सुरक्षित रहन नगरवासीलाई नेपालीकांग्रेस रामधुनी नगरसमितिले आग्रह गरेको छ । मंगलबार एक विज्ञप्ती जारी गर्दै नगरसमितिले कोरोना संक्रमण दर तीव्र भईरहेको अवस्थामा आई.सि.यु. र भेन्टिलेटरको अभाव पनि बढ्दो अवस्थामा रहेको उल्लेख गर्दै उच्च सतर्कता अपनाउन अनुरोध गरेको हो ।
नगर सभापति सुदिप अधिकारी हस्ताक्षरित विज्ञप्तीमार्फत कोरोना कहरको विषम परिस्थितिको नियन्त्रणका लागि लागु भएका स्वास्थ्य मापदण्ड पालना गर्न अपिल गरेको हो । रामधुनी काँग्रेसले कोभिड १९ बाट बच्न रामधुनी नगर क्षेत्रभित्र भएको स्रोत साधनको पहिचान गरी प्रयोगमा ल्याउन तथा तयारी अवस्थामा रहन समेत रामधुनी नगरपालिकालाई माग गरेको छ ।
कोभिड कहरकै कारण गत वर्ष भएको लकडाउनमा दैनिक ज्याला मजदुरी गरी जिविकोपार्जन गर्ने जनता भोकभोकै बस्न बाध्य भएको स्मरण गर्दै नगर सभापति अधिकारीले त्यस्ता लक्षित वर्गलाई उचित राहत प्याकेज व्यवस्थापन गर्न सरोकारवाला,प्रशासनिक निकाय,सहयोगी दाता, समाजसेवी तथा बुद्धिजिवी वर्गलाई अनुरोध समेत गरेको छ ।
रामधुनी नगर कांग्रे्रेसले आफु मातहत नगरका सवै वडाका पार्टीका वडा सभापति, पार्टीबाट जनप्रतिनिधिमा निर्वाचित नेताहरु, पार्टीका सबै भातृ तथा शुभेच्छुक संस्थाहरु, काँग्रेस प्रति निष्ठावान व्यक्ति, उद्योगी , व्यापारी , तथा सरोकारवाला सवैमा यो विषम परिस्थितिमा उच्च सर्तकता अपनाउदै आफ्नो तर्फबाट गर्न सक्ने सहयोग गरी सामाजिक एकता, मानवता तथा भातृत्वको भावना जागृत गर्न समेत अपील गरेको छ ।
रामधुनी कांग्रेसले कोभिड कहरको विषम परिस्थितिमा फ्रण्टलाईनमा अहोरात्र खटिने स्वास्थ्यकर्मी तथा सुरक्षाकर्मीहरुप्रति उनीहरुको त्याग तथा सर्मपणका लागि उच्च सम्मान व्यक्त गर्दै आभार समेत प्रकट गरेको छ ।
कोभिड १९ को कहरबाट बच्न सबै स्वास्थ्य प्रोटोकल अनिवार्य पालना गर्न आग्रह गरेको रामधुनी नगर काँग्रेसले रामधुनीमा कोरोना कहर नियन्त्रणका लागि अग्रसरता देखाउदै परिआएको जस्तोसुकै सहयोग तथा समन्वयका लागि आफु तयार रहेको संकेत गरेको हो ।
