सुनसरी । प्रतिनिधिसभा तथा प्रदेश सभा निर्वाचको मतगणना सुरु भएसंगै सुनसरीका ४ वटै निर्वाचन क्षेत्रका उम्मेद्वारहरुको प्रतिस्पर्धाले रोमान्चक मोड लिएको छ ।
याे समाचार तयार पार्दासम्ममा सुनसरी क्षेत्र नं. २ र ३ मा राष्ट्रिय स्वतन्त्र पार्टीका उम्मेद्वारहरुले नेकपा एमाले तथा नेपाली कांग्रेसका निकटतम प्रतिस्पर्धीहरुलाई पछि पार्दै अग्रता कायम राख्न सफल भएका छन् ।
त्यस्तै सुनसरी क्षेत्र नं. १ को लोकतान्त्रीक बामगठबन्धनका उम्मेद्वार रहेका मुक्सामहाङ सुब्बाले नेकपा एमाले र जनता समाजवादी पार्टी नेपालको संयुक्त उम्मेद्वार अशोक कुमार राईलाई १०० मतको झिनो अन्तरले अग्रता लिएका छन् ।
त्यसैगरी सुनसरी विशेष ध्यानाकर्षको क्षेत्रको रुपमा रहेको क्षेत्र नं.४ मा सुरुवाती अग्रता कायम गरेका कांग्रेसका ज्ञानेन्द्रबहादुर कार्कीलाई नेकपा एमालेका जगदिश प्रसाद कुशियैतले २०० मत प्रप्त गर्दै अग्रता कायम गरेका छन् ।
सुनसरी क्षेत्र नं. २ मा नेपाली कांग्रेसका सिताराम मेहता र प्रदेश १ का पूर्व मुख्य मन्त्री तथा नेकपा एमालेका उम्मेद्वार भीम आचार्यलाई पछि पार्दै राष्ट्रिय स्वतन्त्र पार्टीका लालबिक्रम थापाले १८९ को मतले अग्रता कायम गरेका छन् ।
साथै सुनसरी क्षेत्र नं.३ मा नेकपा एमालेकी भगवती चौधरी र लोकतान्त्रीक बाम गठबन्धनको तर्फबाट नेपाली कांग्रेसका साझा उम्मेद्वार विजय कुमार गच्छदारलाई क्रमश: दोस्रो तथा तेस्रो स्थानमा झार्दै राष्ट्रिय स्वतन्त्र पार्टीका कमलबाबु मैनालीले ९५ को झिनो मतान्तरले अग्रता लिएका छन् ।
सुनसरीको ४ वटा क्षेत्रमा भएको निर्वाचन प्रतिस्पर्धीले आम जनमानसको चासोको केन्द्र बनेको छ । हाल मतगणना कार्य जारी रहेको छ ।
